O PPdeG condena a colaboración de Franco co nazismo e o fascismo para "exterminar" republicanos
Os populares apoiaron unha declaración conxunta con En Marea, PSdeG e BNG sobre o Holocausto que insta á Xunta a traballar "contra posibles brotes de racismo, xenofobia, antisemitismo e outras discriminacións"
Por Europa Press / Redacción | Santiago de Compostela | 30/01/2019 | Actualizada ás 13:59
O Parlamento de Galicia emitiu este mércores unha declaración institucional asinada por todos os grupos do Lexislativo (PPdeG, En Marea, PSdeG e BNG) na que se condena o Holocausto e a "colaboración" da ditadura franquista co nazismo alemán e o fascismo italiano, ao deportar "a máis de 10.000 republicanos españois" que terminaron nos campos de concentración.
O presidente do Pazo do Hórreo, Miguel Ángel Santalices, foi o encargado de ler este texto escrito con motivo do día internacional de conmemoración anual en memoria das vítimas do Holocausto --entre as que se contan tamén galegos--, que foi fixada o 27 de xaneiro pola Asemblea Xeral da ONU en 2005.
Así, o Parlamento autonómico tacha a este feito histórico como un "programa de persecución, encarceramento e exterminio" levado a cabo polo nazismo "que asasinou a máis de seis millóns de persoas".
"Tivo a súa orixe no intento de eliminación da disidencia política de e ideolóxica e derivou nun xenocidio que contou coa colaboración da ditadura franquista e que perseguiu a miles de homes e mulleres que fuxiron do Estado español despois da derrota da República en 1939 e tras a instauración dun réxime fascista", relata a declaración institucional.
Por todo iso, a Cámara galega lembra "aos máis de 10.000 republicanos españois que terminaron deportados nos campos nazis pola colaboración do ditador Francisco Franco co nazismo alemán e o fascismo italiano".
CASE 200 GALEGOS NOS CAMPOS
Ademais, cifra en case 200 as persoas orixinarias de Galicia que "morreron alí ou foron liberados", aínda que "nunca puideron regresar, porque a ditadura franquista, que lles retirou previamente a nacionalidade, negoulles o dereito a regresar ao seu país de orixe".
"Por todo isto, o Parlamento de Galicia fai súa a declaración da Asemblea Xeral das Nacións Unidas na que se rexeitou toda negación, xa sexa parcial ou total, do Holocausto como feito histórico. E condenou sen reservas, condena que tamén este Parlamento fai súa", prosegue.
Así as cousas, o Lexislaitvo autonómico insta á Xunta a traballar "contra os posibles brotes de racismo, xenofobia, antisemitismo e outras discriminacións baseadas na orixe étnica ou nas crenzas relixiosas, e aos cidadáns e ás súas organizacións a permanecer vixiantes para que nunca máis" ocorra algo semellante.
