Os traballadores de Poligal protestan contra o peche da fábrica ante os xulgados de Ferrol

Os traballadores da empresa Poligal protagonizaron na mañá deste mércores unha sonora pitada ante as instalacións dos xulgados de Ferrol no día e á hora que estaba previsto que se celebrase unha vista pola demanda presentada hai meses por este colectivo.

Reclamaron que se executase unha sentenza que obrigaba á dirección da compañía a realizar investimentos por un valor de seis millóns de euros na planta situada no polígono da Gándara, en Narón (A Coruña), dedicada á fabricación de filme de polipropileno para o sector da alimentación.

Os operarios, que están ameazados de despedimento ao solicitar a empresa concurso de acredores e un Expediente de Regulación de Emprego (ERE) extintivo para todos eles, desprazáronse á sede situada na rúa Coruña con bucinas de aire, chifres e outros obxectos co fin de xerar un gran ruído.

Un dos delegados do comité de empresa, Bernardo Cabezal (CIG), explicou que a súa presenza ante a sede xudicial foi "para reivindicar a falta de investimento en Narón, xa que comprometera un plan de viabilidade para investir seis millóns de euros, para asegurar o futuro da empresa, pero con todo optaron por levar 40 millóns de euros para Polonia, pechar o noso centro de traballo e mandarnos a todos á rúa."

ADMINISTRADOR CONCURSAL

O representante sindical tamén trasladou que polo momento non tiveron ningún contacto co administrador concursal, e que saben "que está nomeado". "Dixo a semana pasada que pasaría por Narón e xa nos convocou para un primeiro encontro, este xoves, 21 de marzo, ás 12,30 horas na sede da empresa", engadiu.

Ademais, o vindeiro venres, 22 de marzo, os traballadores de Poligal desprazaranse ata A Coruña, á sede do Igape, para constituír a mesa proposta polo conselleiro de Economía, Emprego e Industria, Francisco Conde, e tratar de buscar así algún investidor que evite o peche desta planta.

Nesa xornada cumprirase un mes desde que a empresa trasladou a súa intención de pechar as instalacións situadas na comarca de Ferrolterra, o 22 de febreiro. "De ánimos estamos ben, continuamos acudindo a diario e segundo a quenda que nos correspondería ao posto de traballo, nesa mobilización continua que mantemos, e entre uns e outros tentamos seguir tirando para adiante", sentenciou Cabezal.

Protesta dos traballadores de Poligal | Fonte: Europa Press