Pescadores galegos e asturianos reclaman unha repartición "máis xusta" para a cota de xarda
"Non pedimos subvencións, pedimos que nos deixen traballar", reivindican.
Por Europa Press / Redacción | Santiago de Compostela | 30/03/2019 | Actualizada ás 11:58
Decenas de pescadores asturianos e galegos que participan na frota da xarda do Cantábrico Noroeste reivindicaron este sábado en Oviedo unha repartición máis xusta da cota desta especie. "Non estamos a pedir subvencións, estamos a pedir que nos deixen traballar como levabamos facendo desde os tempos dos nosos avós", sinalou o patrón maior da confraría do Grove (Pontevedra), Antonio Otero.
Os galegos sumáronse aos pescadores para participar nunha concentración en Oviedo, onde ao longo de dúas horas estarán a repartir pescado á cidadanía e transmitindo as súas reivindicacións, que pasan por unha repartición máis xusta da cota de xarda.
Nese sentido, o expresidente da Federación de Confrarías de Pescadores de Asturias, Dimas García, afirmou que a repartición actual é "inxusta" xa que deixa á frota asturiana --formada por uns 150 barcos e 700 traballadores-- cun 14% de cota, mentres que os vascos, "con menos frota", teñen un 42%.
"Non sabemos por que esa repartición, pero cremos que hai moitos motivos políticos", indicou García, que se mostrou esperanzado de poder reverter a situación con máis forza grazas á unión da frota asturiana e galega. O expresidente das confrarías valorou a actitude reivindicativa do Principado ante Madrid pola cota, pero lamentou que as súas demandas non sexan tidas en conta.
Doutra banda, o patrón maior da confraría de pescadores do Grove, Antonio Otero, cualificou a situación como "ao bordo da catástrofe". "Imos á campaña para que o día de mañá se fan a repartición segundo históricos nos saquen o pouco que temos, porque nestes momentos estamos a perder diñeiro", explicou.
Así, tachou a actual repartición de cota favorable ao País Vasco como "inxusto, vergoñoso e insustentable". Otero explicou que en 2013 acordouse unha repartición que "esnaquizaba" a frota galega e asturiana e que ata hoxe "non se fixo nada máis", pero coas restricións de Europa, "os que menos temos aínda temos menos".
"Isto ten que romper un día, polo que temos que aproveitar esta época electoral para que se aclaren e digan o que van facer connosco", afirmou, para aclarar que non piden subvencións, "estamos a pedir que nos deixen traballar como levamos facendo desde os tempos dos nosos avós". Sobre a unión de pescadores e asturianos explicou que "a unión fai a forza". "Aos políticos interésalles que vaiamos cada un polo noso lado", polo que defendeu "ser intelixentes e ter unha soa voz en Madrid ou onde sexa".
