A Policía trae can especializados de Madrid para investigar as causas do lume da Chavasqueira
Quere realizar un informe o máis completo posible.
Por Europa Press / Redacción | SANTIAGO DE COMPOSTELA | 02/05/2019 | Actualizada ás 10:17
A Policía Nacional inspeccionará a principios da próxima semana con cans especialistas en zonas de incendios procedentes de Madrid as instalacións termais da Chavasqueira queimadas polo lume do pasado 24 de abril.
Así o confirmaron a Europa Press fontes policiais, que explicaron que os compañeiros da Policía Científica procedentes de Madrid que acudiron a colaborar cos compañeiros de Ourense xa fixeron o seu labor e agora guías caninos da capital madrileña desprazaranse ata A Chavasqueira para proseguir cos labores de inspección.
As mesmas fontes destacaron que os axentes da Policía Científica de Ourense queren "apoiar as súas hipóteses" coa inspección que realicen os guías caninos de Madrid especialistas en incendios entre o luns e o martes da próxima semana.
SEGUE O TRABALLO
Deste xeito, a Policía Nacional segue traballando para elaborar o informe definitivo sobre as causas do incendio que na madrugada do pasado mércores 24 de abril calcinou as instalacións de madeira nas termas da Chavasqueira.
A Policía tomou a semana pasada declaración ao traballador que estaba nas instalacións e aos primeiros en chegar á zona do incendio. Tamén recolleu outros indicios no exterior da zona afectada con perigo de derrube tras o incendio para elaborar o atestado.
