Rexeitada no Parlamento a petición de cesamento para Tahoces
Antón Sánchez, de En Marea, acusou a Tahoces de emprender unha política "tolerante coa contaminación" e cunhas explotacións que puxeron en risco a saúde das persoas.
Por Europa Press / Redacción | SANTIAGO DE COMPOSTELA | 07/05/2019 | Actualizada ás 18:47
O pleno autonómico abordou de novo a situación do director xeral de Minas, Ángel Bernardo Tahoces, citado como investigado por un suposto delito de prevaricación ambiental en relación coa explotación mineira de San Finx, en Lousame. A Cámara rexeitou, cos votos en contra do PP e a abstención do PSOE, unha moción de En Marea para pedir o cesamento do cargo do Goberno galego e que "lle dea carpetazo" definitivo ao proxecto mineiro de Touro-O Pino.
A iniciativa pedía tamén instar á Xunta a cambiar as políticas de minaría para avanzar cara a un cambio de modelo máis sustentable e a anular a Lei de Fomento de Iniciativas Empresariais de Galicia, a chamada "Lei Depredadora", aínda que ambas as propostas non prosperaron tras os votos en contra do grupo 'popular'.
Antón Sánchez, de En Marea, acusou a Tahoces de emprender unha política "tolerante coa contaminación" e cunhas explotacións que puxeron en risco a saúde das persoas, feitos que se xulgan en Noia pola xestión no caso de San Finx e que "non son a excepción, senón a norma" e exemplo da "inacción da administración".
"Está a axudar ás empresas a demostrar que -as balsas de residuos abandonadas-- non pertencen á explotación para que teñamos todos que pagar cos nosos impostos a restauración destas balsas, que tiña que facer a empresa", reprochou, insistindo en que Tahoces "nin cumpre nin fai cumprir a lei" e foi "colaborador activo" de empresas contaminantes mentres "obstaculizaba" o traballo de colectivos ecoloxistas que "queren defender o país".
"Señor Sánchez, vaia cara e vaia hipocrisía a súa", espetou o 'popular' Moisés Blanco Paradelo a Antón Sánchez, a quen acusou de reclamar "xustiza" para os presos do 'Procés' en Cataluña mentres "en Galicia non defende o Estado de Dereito". "Cre que ten -Tahoces- dereito a poder explicarse e defenderse ante un xuíz?", preguntou do deputado do PP, quen esgrimiu o "respecto escrupuloso" ao traballo da Xustiza fronte a "xuízos paralelos" e "vendettas" daqueles "aos que non lles importa a verdade".
Branco Paradelo defendeu que "todos os proxectos tramítanse con rigor" e con "garantías" técnicas e ambientais, lembrando a lei de Minaría aprobada "polo bipartito" en 2008. "Tivo que recorrer a Cataluña", chanceou Sánchez, ironizando con que o PP veña "a dar leccións de cumprimento da legalidade" nun momento en que o ata hai pouco "home forte do rural galego", Juan Pérez Miramontes (antigo membro de Xóvenes Agricultores), está procesado "por trata de brancas".
UN MODELO "SUSTENTABLE"
Sánchez denunciou que se manteña este modelo mineiro, no que "se privatizan os beneficios e se externalizan os pasivos ambientais", lembrando que mesmo Augas de Galicia certificou que os regatos da contorna de Touro "estaban contaminados". "Aínda así o PP segue defendendo a reapertura da mina, un megaproyecto incompatible coa saúde e o medio ambiente".
O deputado reclamou, así, "un modelo de explotación sustentable" fronte a outro que "destrúe emprego e destrúe futuro" e que "se lle de carpetazo" á reapertura de Touro, esixindo ao PP deixe de dar "oportunidades" á empresa de "demostrar o indemostrable". Nesta liña, pediu tombar "a lei de depredación", vendida falsamente como "a panacea contra a deslocalización e a fixación de capital"
Abel Losada, por parte do grupo socialista, insistiu en que non cuestionan "a minaría e a industria", senón que se debe incrementar "o control ambiental", evitar casos de "abandono de funcións" como o de Touro e ao mesmo tempo garantir a dispoñibilidade das materias primas "necesarias" a través dunha actividade "menos disruptiva". Así mesmo, denunciou que a Xunta deixou sen executar máis do 75% do orzamento dedicado a restauración de espazos degradados nos últimos anos, "deixando sen gastar 1,7 millóns de euros".
CONTRA A "DEPREDACIÓN"
O deputado socialista reclamou, neste sentido, que os populares deixen "o discurso insustentable" sobre a lei de "depredación", con esa "mestura de buenismo político e defensa de intereses privados", cando se trata de "unha redución do control efectivo" sobre a actividade das empresas.
Pola súa banda, Xosé Luís Rivas 'Mini' foi claro: "Van ternos sempre en fronte mentres non asuman a decencia política". O deputado nacionalista denunciou os "agravios" a Galicia para defender "os intereses do capital", cunha Xunta "facendo ridículas esixencias medio ambientais" e con políticos "estratexicamente colocados" para eliminar "obstáculos" das empresas para acceder a estas concesións,
Neste sentido, reprochou que o Goberno se dedique "a marear a perdiz" coas responsabilidades de Tahoces, ante acusacións de "presunta prevaricación ambiental", ausencia de controis, balsas "ameazantes", e actividades de "espolio e de rapina" por parte de empresas que "non deixan lucro e hipotecan o futuro". "Todo vale nos negocios", ironizou, advertindo as prácticas "de marcado corte colonial" defendidas polo PP.
