Rebáixanlle a dous anos a pena por seis incendios en Ourense pola súa adicción ao alcol
O tribunal suspende a pena de cárcere a condición de que siga un tratamento de deshabituación do alcol e posteriormente cumpra dous anos de liberdade vixiada
Por Europa Press / Redacción | SANTIAGO DE COMPOSTELA | 23/05/2019 | Actualizada ás 16:08
R.G.G. , de 44 anos e sen antecedentes penais, aceptou este xoves unha pena de dous anos de prisión por provocar seis incendios forestais durante o verán de 2017 no municipio de Maceda. A execución da pena foi suspendida coa condición de que siga un tratamento de deshabituación do alcol e se someta a dous anos de liberdade vixiada unha vez cumprida a pena de prisión.
As partes, Ministerio Fiscal, acusación particular e defensa, chegaron a un acordo ao considerar que o acusado padece desde o punto de vista psiquiátrico un diagnóstico dual vinculado ao alcoholismo e ao comezo da abstinencia que limita as súas capacidades intelectivas e volitivas na actualidade e no momento dos feitos.
Nun primeiro momento, a fiscal no seu escrito de acusación culpábao de provocar nove incendios durante o verán de 2017, finalmente este xoves retirou a cualificación aos tres incendios producidos o día 1 de agosto de 2017.
Ademais, deberá pagar unha multa de dous euros diarios durante quince meses e facerse cargo da responsabilidade civil polos gastos de extinción dos incendios e danos ocasionados. Por isto último, a indemnización ao Servizo de Extinción de Incendios ascende a case 1.800 euros. Así mesmo, a Fiscal solicitoulle unha rehabilitación especial en canto ao exercicio de tarefas relacionadas co monte.
"ACORDO SUMAMENTE BENEFICIOSO"
O seu avogado, Alejandro Zulueta Sánchez, entendeu que "se trata dun acordo sumamente beneficioso para o acusado tendo en conta que non ten que entrar en prisión e, ademais, vai seguir en tratamento", a pesar de non conseguir a absolución buscada.
"A nivel de xustiza entendemos que é o mellor para o noso cliente e, do mesmo xeito que o Ministerio Fiscal e a acusación particular, coincidimos en sinalar que o ingreso en prisión non lle beneficiou en absoluto. Entendemos que o obxectivo da xustiza é reintegrar ás persoas e non só o mero castigo", concluíu.
