O Colexio de Enxeñaría Informática de Galicia nomea colexiado de honra ao director xeral de Mobile World Capital
Por E.P. | SANTIAGO DE COMPOSTELA | 26/06/2019 | Actualizada ás 11:53
O Colexio profesional de Enxeñaría Informática de Galicia outorgou o premio Colexiado de Honra ao director xeral de Mobile World Capital Barcelona (MWCapital), Carlos Grau Lara, polo seu labor profesional no ámbito das tecnoloxías da información e as comunicacións, así como no desenvolvemento de negocio dixital.
A XI Noite da Enxeñaría en Informática en Galicia celebrarase este venres, 28 de xuño, no Hotel Monumento San Francisco de Santiago, evento ao que asistirá Grau para recoller este galardón. A maiores, os premios da noite corresponden a 10 categorías, nos que os colexiados recoñecen as iniciativas ou persoas destacadas no ámbito da enxeñaría en informática.
Carlos Grau Lara é Enxeñeiro Industrial pola Universidade Politécnica de Cataluña e PDD por IESE. Tras ocupar diversos cargos de dirección de vendas e mercadotecnia en empresas do sector TIC, como Hewlett-Packard, Accenture, Sun Microsystems ou Telefónica, Grau uniuse a Microsoft como director xeneral en Cataluña.
Nos anos previos a incorporarse a MW Capital, Carlos Grau centrou a súa actividade no campo da innovación, onde liderou proxectos como Biid, startup centrada na identidade móbil, ou Step One Ventures, fondo de capital de risco que inviste en compañías tecnolóxicas con alto potencial de crecemento. Desde novembro de 2017 ocupa o cargo de director xeral de MWCapital.
