Cristina Pato, Davide Salvado e Ugia Pedreira protagonizan este fin de semana o festival 'Abride a Fiestra' de Padrón
O escritor Pedro Feijoo, o deseñador Pepe Varro, o expresidente da Real Academia Galega Xosé Ramón Barreiro e o profesor Francisco Rodríguez exercerán de guías pola casa museo da escritora.
Por Europa Press / Redacción | SANTIAGO DE COMPOSTELA | 13/07/2019 | Actualizada ás 09:46
A Fundación Rosalía de Castro pon en marcha a segunda edición do festival 'Abride a Fiestra', que terá lugar os días 13 e 14 de xullo na Casa de Rosalía, situada na localidade coruñesa de Padrón, e que acollerá diferentes manifestacións culturais tendo á escritora galega como figura central. Entre os protagonistas do fin de semana estarán Cristina Pato, Davide Salvado, Ugia Pedreira, Secho, Paco Nogueiras e a Coral de Padrón.
O programa comezará o sábado, día 13, cun recital poético multilingüe co Colectivo de Poetas en Bruxelas e un grupo representativo da poesía galega actual. Neste sentido, participarán os escritores Taha Adnam, Frank de Crits, Geert van Istendael, Serge Meurant, Silvia Vainberg, Bart Wonck, Ramón Neto e Yolanda Castaño. Terminará a xornada cun concerto de Cristina Pato, acompañada por Roberto Comesaña, "o único desta tempada que ofrecerá en Galicia", segundo subliñou a organización nun comunicado.
O día "grande" será o domingo, cando se celebrará unha xornada de portas abertas na Casa-Museo, na que ademais de actuacións musicais, unha ludoteca e unha feira con produtos rosalianos, haberá visitas guiadas por personaxes coñecidos ou especialistas.
"Entre as persoas que nos guiarán polos diferentes cuartos da Casa da Matanza están o escritor Pedro Feijoo, o deseñador Pepe Varro, o expresidente da Real Academia Galega Xosé Ramón Barreiro e o profesor Francisco Rodríguez", indicaron as mesmas fontes.
Tamén haberá oferta para toda a familia con contidos para os máis pequenos, como espectáculos do cantor Paco Nogueiras e unha ludoteca. Ademais, presentarase o Libro Escolar de Poesía.
