A campaña 'Os Bolechas pola igualdade' chegará a colexios para "romper coa fenda de xénero" desde os máis pequenos

A conselleira de Educación, Carmen Pomar, e a secretaria xeral de Igualdade, Susana lópez Abella, presentaron este martes en Santiago a campaña 'Os Bolechas pola igualdade' destinada a "romper coa fenda de xénero desde as idades máis temperás".

A iniciativa, enfocada a nenos e nenas de primeiro e terceiro de primaria, levarase a cabo en colexios a través dun libro dos Bolechas, unha unidade didáctica e un caderno para traballar estes temas cos alumnos.

Un material de aprendizaxe que será distribuído polos centros educativos para "reforzar a educación en igualdade de xénero que os máis pequenos teñen que interiorizar" de forma que "vaian contribuíndo a cambiar a sociedade na que vivimos", segundo informou Carmen Pomar.

Ademais, ambas as dirixentes presentaron, por segundo ano consecutivo, a campaña 'Xoguetes para a igualdade', coa que se "incentiva" a nenos e nenas a que este Nadal pidan os xoguetes que lles gustan "independentemente da cor dos mesmos ou da súa utilidade".

Neste sentido, a secretaria xeral de Igualdade sinalou que "é importante concienciar desde pequenos que os xoguetes non teñen sexo" e engadiu que "os Bolechas son un bo instrumento para traballar a igualdade e a prevención da violencia machista".

A este respecto, a conselleira de Educación indicou que se pretende "romper ese estereotipo de xénero que é buscar xoguetes para nenos e xoguetes para nenas" e "mesmo coas cores" porque, engadiu, "moitas veces píntase de rosa o que ten que ver coas nenas e de azul o relacionado cos nenos".

O material da campaña estará dispoñible en todos os comercios galegos para "reforzar fundamentalmente nas familias esa igualdade de xénero" e "axudarlles" a que só teñan en conta "os intereses, preferencias e talentos dos seus fillos e fillas á hora de escoller os agasallos deste Nadal".