O novo acordo da UE deixa a España cun 5,5 por cento menos de cota de pescada
A frota española poderá pescar 5.600 toneladas de pescada en augas ibéricas (Cantábrico, Galicia e Golfo de Cádiz).
Por Europa Press / Redacción | BRUSELAS | 18/12/2019 | Actualizada ás 10:29
Os ministros de Pesca da Unión Europea alcanzaron este mércores pola mañá, tras case 21 horas de negociación, un acordo para a repartición das posibilidades de pesca no Atlántico e o mar de Norte en 2020 que inclúe un recorte do 5,5 por cento nas capturas de pescada de augas ibéricas, fronte ao 20 por cento que expuña a Comisión Europea.
Con respecto ao xurelo pescado ao sur de Fisterra e no Golfo de Cádiz, outra prioridade para a delegación española, o acordo definitivo recolle un incremento do 24,3 por cento que contrasta coa diminución do 50 por cento que defendía Bruxelas.
O consenso entre as capitais europeas chegou pouco antes das 6,30 horas deste mércores, despois de que os ministros do ramo iniciasen os debates ás 9,30 horas do martes e, posteriormente, comezase unha longa xornada de reunións entre delegacións nacionais e co Executivo comunitario.
Así, a frota española poderá pescar 5.600 toneladas de pescada en augas ibéricas (Cantábrico, Galicia e Golfo de Cádiz). Tamén poderá acceder a 13.000 toneladas desta especie no Golfo de Biscaia (un 19 por cento menos que en 2019) e a 18.700 toneladas en caladoiros do Gran Sol (un 20,6 por cento menos).
O aumento do 24,3 por cento das capturas de xurelo sur permitirá aos buques con pavillón español pescar ata 30.200 toneladas deste recurso. No entanto, España non conseguiu aliviar o recorte para o xurelo do Cantábrico, cuxa pesca descenderá o próximo ano un 41 por cento.
Tamén caerán un 3,4 por cento as capturas de rape en augas ibéricas (3.350 toneladas para España), aínda que se verán compensadas por incrementos para esta especie no Golfo de Biscaia (7,6 por cento) e no Gran Sol (7 por cento). A pesca de galos é a que sae da negociación con incrementos en todas as poboacións, especialmente en augas ibéricas (un 24 por cento). As capturas desta especie crecerán tamén un 5,3 por cento no Golfo de Biscaia e un 3,3 por cento en caladoiros do norte.
CUARTO ANO DE VEDA PARA O LAGOSTINO DO CANTÁBRICO
Doutra banda, a pesqueira de lagostino no Cantábrico seguirá pechada en 2020, sumando así catro anos de veda. As capturas de lagostino no Golfo de Cádiz, pola súa banda, reduciranse un 3,7 por cento.
Nesta liña, a Comisión Europea e España comprometéronse a seguir traballando, a través do Instituto Español de Oceanografía (IEO), pasa solicitar cando sexa posible e segundo os datos que se vaian obtendo, a revisión da situación do lagostino do Cantábrico.
