A Xunta convocará aos sindicatos a próxima semana para abordar as oposicións docentes
Pomar reuniuse con estas entidades e representantes de ANPA, que piden instrucións claras para o terceiro trimestre e o próximo curso
Por Europa Press / Redacción | SANTIAGO DE COMPOSTELA | 23/04/2020 | Actualizada ás 21:14
A Consellería de Educación, Universidade e Formación Profesional convocará aos representantes sindicais a próxima semana para abordar a situación das oposicións docentes, un proceso que quedou aprazado ata o próximo ano debido á alerta sanitaria que afecta a todo o territorio nacional.
Pomar anunciou o mércores no Parlamento a decisión de levar o proceso selectivo ao próximo ano, unha cuestión que os sindicatos levaban semanas reclamando, pero que aínda deixaba algunhas incógnitas sobre a mesa, como as prazas de 2021 ou a inscrición para o proceso.
Este xoves, a titular de Educación reuniuse telematicamente con representantes das organizacións docentes, entre elas CIG-Ensino, CC.OO Ensino, Anpe Galicia e FeSP-UGT, así como de Confapa-Galicia, Anpas Galegas e Congapa.
Os portavoces sindicais criticaron a xestión das oposicións, aínda que o tema en si non foi abordado no encontro, senón que Pomar avanzoulles que serían convocados en próximos días na mesa sectorial para tratar os pormenores do adiamento.
A fenda dixital, a terceira avaliación e o próximo curso, foron algúns dos temas que se trasladaron no encontro, e no que as organizacións mostraron as súas inquietudes respecto diso e a necesidade de dotar aos centros de instrucións claras.
Neste sentido, Pomar insistiu na responsabilidade do Ministerio de Educación para fixar un criterio para a promoción do alumnado e os requisitos de titulación, e comprometeuse a publicar instrucións "coa máxima celeridade" unha vez que o Goberno central clarifique e publique a normativa correspondente. Tamén reiterou a súa petición ao Estado de que se impulse un plan con recursos para paliar a situación das comunidades autónomas máis afectadas pola dispersión e a fenda dixital.
INSTRUCIÓNS "CLARAS"
Desde a CIG-Ensino, Suso Bermello lamentou o "paripé" do encontro, cun formato "encorsetado" que imposibilitaba o debate e a profundidade de discusión das medidas e reclamacións. FeSP-UGT tamén reprochou este punto, no que se concederon cinco minutos por cada organización convocada para presentar os seus puntos de vista. "Unha reunión protocolaria e sen posibilidade de reciprocidade".
Bermello esixiu "instrucións detalladas" por niveis para a avaliación do curso, e nas que se teña en conta as dificultades de conectividade do alumnado, ademais de solicitar unha planificación e un reforzo de face ao próximo período escolar, sobre todo na dotación de profesorado, entre outras cuestións.
Pola súa banda, ANPE-Galicia tamén insistiu na necesidade de contar con directrices claras para o final de curso, nas que se teña en conta ao alumnado con necesidades especiais, e solicitou un plan de retorno á actividade lectiva presencial que permita preservar a saúde da comunidade educativa.
