A Xunta pide ao Goberno unha liña de préstamos para a vendima deste ano

A Xunta solicitou este luns ao Goberno central unha liña específica de préstamos do Instituto de Crédito Oficial (ICO) dirixida ao sector vitivinícola de cara á vendima deste ano.

O titular de Medio Rural, José González, participou este luns na reunión telemática do Consello Consultivo de Política Agrícola para Asuntos Comunitarios, na que demandou un paquete de axudas ante a caída da canle de restauración, de forma que se garanta a compra de uva para esta campaña.

Así mesmo, González sostén que as axudas aprobadas polo Ministerio de Agricultura de 90 millóns de euros para o sector non cubren as necesidades do sector galego, posto que non se adaptan á realidade de Galicia, cunha cantidade "irrisoria" para as denominacións de orixe e as máis de 20.000 familias que viven do viño.

Xunto a isto, o Goberno galego pide tamén ao Estado que habilite axudas directas para o sector vacún de carne, afectado pola caída de prezos respecto da crise sanitaria. A este respecto, lembra que o sector da carne en Galicia é o terceiro maior de España, só por detrás de Cataluña e Castela e León.

PAQUETE DE MEDIDAS POR 25 MILLÓNS

O ministro de Agricultura, Pesca e Alimentación, Luis Planas, anunciou este luns un paquete de medidas adicionais de apoio estatal ao sector agrario, valorado en preto de 25 millóns de euros, para apoiar o sector da flor cortada e do porco ibérico, especialmente afectados pola crise sanitaria da Covid-19, así como para medidas de promoción dos Alimentos de España.

En concreto, debido ás circunstancias derivadas da declaración do estado de alarma, co peche de viveiros de flor cortada e planta ornamental e a cancelación de festexos tradicionais, o departamento de Agricultura decidiu pór en marcha para este ano 2020 unha liña de axudas para o sector dotada con 10 millóns de euros.

Así mesmo, o peche da canle Horeca ocasionou unha caída do consumo dunha parte importante dos produtos do porco ibérico. Para aliviar a situación deste mercado, o Ministerio destinará 10 millóns de euros para subvencionar o sacrificio de animais, cunha idade e peso diferente aos que permitirían ser comercializados baixo a norma de calidade para a carne, o xamón, a paleta e o lombo ibérico.

En relación coas medidas de promoción, Planas explicou que se destinarán 4,9 millóns de euros para campañas dos Alimentos de España e para apoiar a campaña específica de promoción internacional en colaboración co ICEX "Spain Food Nation".

Vendima. CCOO