O Grupo Puentes, outra das grandes construtoras galegas pasa a mans dunha multinacional chinesa
A empresa manterá a sede en Sigüeiro, pero dependerá completamente de Road & Bridge Corporation.
Por Europa Press / Redacción | SANTIAGO DE COMPOSTELA | 26/06/2020 | Actualizada ás 18:52
A compañía China Road & Bridge Corporation faise con dous terzos do accionariado de Grupo Puentes despois de meses de negociacións para chegar a este acordo.
Segundo informan a Europa Press fontes coñecedoras da operación, Grupo Puentes manterá tanto a súa sede social como as súas oficinas centrais en Sigüeiro, no municipio de Oroso (A Coruña), mentres continuará á fronte da súa xestión o mesmo equipo.
O acordo materializouse previa autorización da Comisión Nacional dos Mercados e a Competencia (CNMC). "Con esta incorporación ao capital, Grupo Puentes gaña músculo financeiro para proseguir no seu proceso de internacionalización", di a empresa nun comunicado.
Tras o proceso de apertura ao exterior en 2007 de Grupo Puentes, nestes momentos a compañía de matriz galega opera en dez países de catro continentes, conta cunha carteira de proxectos valorada nuns 300 millóns de euros e factura fóra de España un 65% da súa cifra de negocios.
Con esta operación, o seu novo propietario prevé a súa expansión e diversificación de mercados, co acceso a licitacións de gran magnitude en calquera parte do mundo. Grupo Pontes, constituído en 1977, conta coa construción da ponte de Rande entre o catálogo dos seus primeiros proxectos.
China Road and Bridge Corporation (CRBC) é unha filial de China Communications Construction Group (CCCC), unha dos maiores grupos de construción do mundo.
