Un ciclista ferido grave é rescatado en Oímbra nun complexo dispositivo de catro horas de duración
Un menor tamén resultou ferido ao caer da bicicleta en Becerreá.
Por Europa Press / Redacción | OURENSE | 21/07/2020 | Actualizada ás 10:27
Un ciclista resultou ferido de consideración tras sufrir unha caída en Oímbra (Ourense), mentres circulaba por pistas forestais no lugar de Videferre. Este accidente puxo en marcha un complexo dispositivo de rescate, que durou catro horas debido ás lesións de importancia padecidas polo ciclista á altura da Capela de Santa Mariña.
Tras recibir aviso sobre as 21,15 horas do luns, mobilizouse un helicóptero medicalizado con base en Ourense, aínda que, finalmente, o home foi evacuado en ambulancia ata o hospital de Verín.
Membros da Garda Civil e bombeiros de Verín tiveron que levar ao ferido en padiola durante 200 metros ata a ambulancia que esperaba no pobo.
Noutra orde de cousas, tamén resultou ferido un menor que circulaba en bicicleta por Becerreá (Lugo), despois de caer dous metros por unha zona con bastante maleza enfronte á piscina municipal.
