Cacerolada ante a Xunta por "incrementar o risco de contaxio" do alumnado para "non gastar un peso"

Aínda que a cacerolada estaba marcada para as 11:30 desta mañá, arredor das 11:20 xa eran audibles os golpes metálicos na arboreda de San Caetano. Varios centos de persoas -convocados por CIG, CCOO, CSIF e a Confederación de Anpas Galegas- facían soar potas, cazolas e olas en rexeitamento ó protocolo disposto pola Consellería de Educación para o regreso ás aulas. Os máis preparados trouxeran bombos e pandeiretas, e arredor das 12 menos vinte achegábase á masa de xente -todos ataviados con máscaras- tres mozos provistos cunha gaita que xa ía soando de camiño.

Entre tanto barullo, os convocantes tiveron que facer soar un altavoz para pedir un silencio xeral co que atender as declaracións dos medios; entre eles varias televisións de ámbito estatal. "Estamos ante unha medida temeraria e incompetente da Xunta de Galicia", defendeu Suso Bermello, Secretario Nacional de CIG Ensino. "Todas as decisións tomadas pola Consellería neste aspecto redúcense a un criterio: non gastar un peso máis en educación, poñendo en risco a presencialidade do curso que vén, pero tamén a teledocencia", apuntou en referencia á ausencia dun plan para reverter a "ruptura da equidade" que ao seu ver tivo lugar como consecuencia da educación a distancia nos meses do confinamento.

Nunha dimensión semellante pronunciouse Luz López, Secretaria Xeral da Federación de Ensino de Galicia, que xustificou o abandono por parte das agrupacións sindicais da mesa de negociación proposta pola Xunta, tratándoa de "paripé". "Cando realmente se quere negociar non se presenta un documento desta índole e con menos de 48 horas de antelación", destacou, subliñando que a mesa tan só era un "trámite" para a Consellería de cara á aprobación do proxecto.

PROTOCOLO "DE COSTAS" ÓS DOCENTES

A deste mércores é a primeira das dúas mobilizacións anunciadas polos sindicatos para protestar contra un protocolo que, consideran, non achega garantías suficientes para protexer a saúde de profesorado e alumnos. Por este motivo, as catro organizacións que integraban a mesa de negociación coa Xunta decidiron abandonar a mesa "nada máis comezar" esta por terse desenvolto o protocolo "de costas" á comunidade educativa. O elemento máis denunciado por profesores e sindicatos é a distancia esixida nas aulas, de apenas 1 metro, por debaixo do recomendado polo propio Ministerio de Sanidade.

No transcurso das declaracións dos convocantes, se ben desapareceu o ruído enxordecedor dos metais, foi xurdindo paseniño un rumor entre os convocados. Unha nai falando cos seus fillos, dous homes discutindo -de boa forma- o descenso do Dépor, unha muller tocando a frauta doce xusto ao carón dos medios de comunicación. Un pouco máis adiante, varias persoas posando cunhas mochilas de sulfatar nas que se podía ler "protocolo anticovid da Xunta". E logo, á sinal dos convocantes, de novo o barullo metálico e as bandeiras ao aire.