A Garda Civil reabre a investigación do asasinato a tiros dun matrimonio de Taboadela en 2009
O fillo da parella foi detido en varias ocasións como presunto autor pero resultou posto en liberdade por falta de probas. Agora, os axentes manexan "novos indicios" que poderían levar ó esclarecemento do caso.
Por Europa Press / Redacción | SANTIAGO DE COMPOSTELA | 27/07/2020 | Actualizada ás 12:45
A Garda Civil vén de anunciar que reabre a investigación do asasinato do matrimonio conformado por José Martínez e Teresa Campos --de 65 e 63 anos, respectivamente-- localizados en abril de 2009 con feridas de bala na contorna da súa vivenda, situada na poboación de Amendo, pertencente ó municipio ourensán de Taboadela.
Once anos despois, a Unidade Orgánica de Policía Xudicial da Garda Civil reactiva o caso tras achar "novos indicios", segundo confirmaron a Europa Press fontes da investigación, que poderían permitir esclarecer o caso polo que foi detido e posto en liberdade en dúas ocasións o fillo da parella, José M.M.C.
OS FEITOS
Os cadáveres foron achados o día despois da súa morte no patio e nun pequeno almacén da casa pola filla do matrimonio cando esta acudía a comer cos seus pais. Ese mesmo día, o fillo, que máis tarde sería detido, apareceu na vivenda familiar mostrándose afectado pola morte dos seus pais. Fontes da Garda Civil indicaron por aquel entón que José Martínez, atopado nas escaleiras na vivenda, presentaba un tiro no pescozo, mentres que a muller tiña un impacto na cabeza e achábase no galiñeiro.
PRESUNTO AUTOR
A Garda Civil de Ourense detivo o 14 de outubro de 2009, seis meses despois do dobre crime, ao fillo do matrimonio, José M.M.C., que tiña 39 anos naquel momento, como presunto autor dos feitos. O home foi posto en liberdade por falta de probas.
Dous anos despois, os axentes volveron detelo e o Xulgado de Instrución número 3 de Ourense decretou prisión provisional comunicada e sen fianza para este, pero a súa defensa recorreu a medida ante a Audiencia Provincial, que ordenou a súa excarceración ante a falta de indicios incriminatorios.
O fillo foi mantido desde o inicio da investigación como principal sospeitoso do asasinato dos seus pais, sobre todo despois de que unha muller á que tiña como coartada, M.R.R, acabase confesando tras ser detida que non estivera co arrestado a tarde en que o matrimonio foi asasinado.
UN BRIGADISTA TIROTEADO
Os cascos de bala atopados no lugar dos feitos tamén apuntaron ao fillo da parella, J.M.M.C., como principal sospeitoso do tiroteo dun brigadista, J.C.L.D., que traballaba con el no Servizo de Extinción de Incendios da Xunta de Galicia. Un suceso ocorrido seis meses antes, en setembro de 2008, na localidade de Xunqueira de Ambía (Ourense).
J.C.L.D regresaba en coche ao seu domicilio despois de estar traballando coa brigada de extinción de incendios de Xinzo de Limia ata as 04.00 horas. O home observou que a vía estaba obstaculizada por ramas e, ao apearse para retiralos, un individuo coa cara tapada efectuoulle varios disparos.
Debido ás lesións causadas polas balas, foi sometido a unha intervención cirúrxica urxente para practicarlle unha nefrectomía, de forma que se lle extirpou o ril esquerdo, que estaba gravemente danado por unha das balas.
Fontes da Garda Civil confirmaron a Europa Press que "os axentes están a volver a estudar todos os casos pendentes na provincia desde o ano 2000", dado que os avances en materia de análise criminal poderíanlles permitir esclarecelos. En concreto, foi con esta revisión cando se atoparon probas que permitiron reabrir de novo o caso do matrimonio de Taboadela.
