O festival compostelán 'Curtocircuíto' celebrarase entre o 3 e o 11 de outubro
Será cun formato "reducido e mixto" que combinará programación en liña e proxeccións e eventos puntuais.
Por E.P. | Santiago de Compostela | 28/07/2020 | Actualizada ás 20:02
O Festival Internacional de Cinema de Santiago 'Curtocircuíto' celebrarase este ano entre o 3 e o 11 de outubro nun formato "reducido e mixto" que combinará programación en liña e proxeccións e eventos puntuais. Así o informaron este martes os seus organizadores, que vincularon esta decisión ás medidas de protección derivadas da pandemia de COVID-19.
Aínda que "en formato compacto", buscan que o festival siga sendo "punto de encontro e lugar para a confluencia de distintas disciplinas, mantendo como eixo principal o cinema de autor e a aposta polas linguaxes contemporáneas".
A convocatoria para a recepción de films a competición queda aberta desde este martes e ata o próximo 10 de agosto, a través da plataforma ShortFilmDepot. A pesar da redución de programación, Curtocircuíto manterá as catro seccións competitivas tradicionais: Radar, Explora, Planeta GZ e Penínsulas, co obxectivo de preservar a esencia do evento.
