A investigación galega capta máis de 135 millóns de fondos europeos
Destacan as investigacións relacionadas con nanotecnoloxías, materiais avanzados, biotecnoloxía e novas formas de produción (NMBP); saúde, cambio demográfico e benestar ou Tecnoloxías da Información e da Comunicación (TIC).
Por Europa Press / Redacción | SANTIAGO DE COMPOSTELA | 02/08/2020 | Actualizada ás 10:00
Galicia sitúase como a sétima comunidade autónoma a nivel español en canto a fondos captados do programa marco de I+D+i da Unión Europea, Horizon2020 (H2020), no período 2014-2019. Segundo o último informe publicado polo Ministerio de Ciencia e Innovación, as entidades galegas captaron 135,6 millóns de euros a través de 132 entidades, pola participación en 321 actividades de I+D+i.
A falta dun ano para que termine o programa H2020, Galicia rexistra un aumento do 56% nos fondos captados polas entidades galegas e dun 35,4% na participación relativa das entidades galegas no conxunto da Unión Europea respecto do anterior programa marco completo.
Esta mellora tamén se produciu en termos relativos, en relación coa porcentaxe de recursos captados por Galicia respecto do conxunto español, que ascendeu dun 2,6 a un 2,8%, así como ao peso dos fondos captados polas entidades galegas respecto do conxunto da UE, pasando de representar un 0,21 a un 0,29%.
Das 132 entidades que obtiveron financiamento a través do programa H2020, 84 son empresas, das cales un 84% son pemes. O liderado desta captación de fondos foi para as universidades, cun 34,7% dos recursos; seguidas polos centros tecnolóxicos (22,6%); as empresas (18,6%) e a Administración pública (10,9%). A continuación sitúanse os centros públicos de investigación, cun 6,1%; as asociacións, cun 3,9%; e as asociacións de investigación, cun 3,2%. Destacan a Universidade de Santiago de Compostela, seguida de Aimen (Asociación de Investigación Metalúrxica do Noroeste) e a Universidade de Vigo.
Aumentou tamén a porcentaxe de proxectos coordinados por entidades galegas no programa H2020, que pasou dun 25,4% no anterior programa marco a un 28,6% no período 2014-2019 de H2020. Por áreas temáticas, destaca a participación galega en nanotecnoloxías, materiais avanzados, biotecnoloxía e novas formas de produción (NMBP); saúde, cambio demográfico e benestar; Tecnoloxías da Información e da Comunicación (TIC); e bioeconomía.
