A nova fichaxe do PP de Baltar: un alcalde amigo dos independentistas
Xosé Miguel Pérez é rexedor de San Xoán de Río pola Agrupación Local de Electores, unha marea local próxima ao nacionalismo. Agora acaba de afiliarse ao PP. O anterior alcalde, do PSOE, tamén fora fichado polo PP antes dos comicios.
Por Galicia Confidencial | Ourense | 26/08/2020 | Actualizada ás 22:20
“Dou a benvida a Xosé Miguel Pérez Blecua á forza política máis importante da historia de Ourense". Deste xeito defendía Xosé Manuel Baltar, presidente da Deputación de Ourense e do PP nesta provincia esta nova fichaxe. "Xosé Miguel encarna perfectamente as características que definen ao Partido de Ourense: centrismo, galeguismo, reformismo e municipalismo”, engadía.
Pero a nova fichaxe de Baltar caeu coma unha bomba en moitos sectores políticos da provincia de Ourense. Xosé Miguel Pérez Blecua, alcalde de San Xoán de Río pola Agrupación Local de Electores San Xoán de Río, e ex militante do BNG, acaba de afiliarese ao PP. Unha afiliación que sorprende nunha persoa próxima ao mundo nacionalista e que mesmo simpatiza con movimentos independentistas cataláns e vascos.
“Xosé Miguel ten visión e capacidade estratéxica, proximidade ao territorio, ambición e forza. Estamos ante unha importante incorporación que achegará enerxía e afouteza a un proxecto político que contempla a Ourense por riba de calqueroutro interese", insistía Baltar nas súas loubanzas ao novo alcalde fichado para o PP.
“O DIÑEIRO”
E por que ficha Xosé Miguel polo PP? “O diñeiro vai ser limitado e hai que buscar axuda das administracións para apoiar os proxectos que queremos ter no concello, e, nese sentido, a Deputación conta con profesionais cualificados e creo que poderán apoiarnos neses proxectos futuros", respondía tendo moi en conta a maxistral frase que inmortalizou nun poema Quevedo: “poderoso caballero es don dinero”.En todo caso, o rexedor de San Xoán de Río suliñou que o seu paso é “individual” e que neste concello seguirá gobernando a “lista transversal”.
Coa incorporación do rexedor de San Xoán de Río, e tras a suma de Castrelo de Miño por unha moción de censura e de Laza, onde Barreal recuperou o bastón de mando, o PP suma a día de hoxe 60 alcaldías á espera da moción de censura de Viana.
Curiosamente, Baltar tamén fichou a quen era alcalde de San Xoán de Río nas pasadas municipais. Pero non era rexedor do PP, senon de PSOE. O presidente da Deputación convenceuno para ir baixo as siglas populares, pero, finalmente, quen gañou os comicios foi Xosé Miguel Pérez, que, curiosamente, tamén acabou fichando polo PP.
