16 lumes, dez deles sen control, arrasan Ourense
Xa son case 10.000 as hectáreas queimadas nesta vaga de incendios.
Por Europa Press / Redacción | SANTIAGO DE COMPOSTELA | 16/09/2020 | Actualizada ás 10:24
A provincia de Ourense rexistra este mércores 16 incendios forestais que afectan a máis de 9.000 hectáreas de superficie, dez deles sen control, tres estabilizados e outro tres permanecen controlados.
Segundo a información actualizada pola Consellería do Medio Rural, seguen activos os incendios da parroquia de Sabuguido en Vilariño de Conso que afecta a 2.000 hectáreas; o de Río Caldo en Lobios con outras 2.000 hectáreas no Parque Natural do Xurés; outros dous en Montes en Cualedro, con 1.300 e 80 hectáreas queimadas; outro que afecta a 500 hectáreas en Chandrexa de Queixa; dous en Manzaneda con 450 e 400 hectáreas; outro na Mezquita con 450 hectáreas; outro en Rairiz de Veiga con 300 hectáreas e outro con 30 en Montederramo.
ESTABILIZADOS E CONTROLADOS
A eles súmanse outro tres incendios estabilizados na provincia de Ourense nos concellos de Vilar de Barrio, con 700 hectáreas queimadas; Vilardevós, con 350 e Muiños, con 11 hectáreas no Parque do Xurés.
Polo seu lado, na provincia de Ourense foron controlados o lume iniciado o sábado na parroquia de Camba en Laza que afecta a 60 hectáreas; outro na parroquia de Pentes na Gudiña cunhas 150 hectáreas calcinadas e outro na Pobra de Trives, cunhas 50 hectáreas.
A eles súmase outro incendio controlado desde as 22,34 horas do luns na parroquia de Peites no municipio lucense de Ribas de Sil, onde arderon unhas 60 hectáreas.
