O BNG propón unha lei de emerxencia climática e Adega denuncia a existencia da "industria" do lume
"A situación de crise ambiental require respostas e os lumes están a volverse máis virulentos precisamente polo cambio climático", manifestou Pontón.
Por Europa Press / Redacción | SANTIAGO DE COMPOSTELA | 17/09/2020 | Actualizada ás 17:55
A portavoz nacional do BNG, Ana Pontón, lamentou que a vaga de incendios en Ourense "é o fracaso de non ser capaz de afrontar o problema" dos lumes forestais en lugares que "todos os anos arden" e fixouse como obxectivo unha lei de emerxencia climática para esta lexislatura. Díxoo así despois de reunirse con representantes de Adega na Cámara galega, quen denunciaron a "industria" que hai detrás do lume.
Pontón explicou que esta lei de emerxencia climática ten que abordar "todos os restos nesta materia" para dar resposta a cuestións como a preservación do territorio, combater os incendios, recuperar a biodiversidade, camiñar cara a unha economía verde, a xestión integral da auga e a rexeneración das rías.
"A situación de crise ambiental require respostas e os lumes están a volverse máis virulentos precisamente polo cambio climático", manifestou Pontón, quen lembrou que a defensa da biodiversidade revelouse como "fundamental" para combater pandemias como a covid-19.
Así, explicou que o obxectivo do BNG é que as mencionadas cuestións teñan a súa "resposta" no Parlamento de Galicia a través dunha lei. A curto prazo, insistiu, é necesario actuar nos incendios forestais con "prevención, limpeza e ordenación" e reiterou unha das sentenzas máis usadas en canto aos lumes: "os incendios apáganse no inverno".
Entre as medidas a curto prazo, o BNG propón un plan de aproveitamento da biomasa forestal e un fondo de preservación de espazos naturais protexidos, destinado especialmente a recuperar os espazos de gran riqueza natural arrasados polas chamas.
"SINTONÍA"
Pola súa banda, o secretario xeral de Adega, Froilán Pallín, manifestou a "sintonía" co BNG nas súas demandas. Así, e tras criticar que "se esta foi a lexislatura do rural, os que habitualmente están no rural", censurou que "segue sen haber política de prevención e sen haber brigadas comarcais" para detectar os incendiarios. Ao fío diso, considerou "patético" que a única persoa xulgada sexa un home "que se lles escapou" un lume por estar a asar uns "chourizos".
"Detrás disto, o que hai é a industria do lume", denunciou, antes de ironizar con que Feijóo podería "nomear conselleiro de Medio Rural e Medio Ambiente ao presidente de Ence". Para o secretario xeral de Adega, é necesaria unha "transición ecolóxica e de emerxencia climática" e é "fundamental traballar nun novo modelo industrial máis xusto e que faga que o desenvolvemento do país non sexa á conta do propio país".
Para Adega, "non se fai nada para que o lume non arda" e mesmo hai "eucaliptos plantados no nacemento do Miño". Ademais, lamentou a "insensibilidad brutal" da sociedade respecto diso dos lumes forestais e asegurou que "quen teñen que tramitar denuncias" polos incendios "non o fan e remiten" ás persoas a que acudan á asociación ecoloxista.
