Restrinxida a mobilidade nos concellos de Ourense e Barbadás desde este xoves
Os seus habitantes non poderán desprazarse fóra do seu termo municipal salvo por motivos laborais, educativos ou sanitarios.
Por Europa Press / Redacción | SANTIAGO DE COMPOSTELA | 08/10/2020 | Actualizada ás 08:30
Os concellos de Ourense e Barbadás manteñen desde este xoves a mobilidade restrinxida no seu termo municipal co fin de frear o avance da Covid-19.
Así o decidiu o comité clínico na tarde do martes pasado en función da evolución epidemiolóxica destas zonas da provincia ourensá que, ademais, acordou prohibir as reunións de persoas non convivientes en Barbadás, Verín e O Barco, así como na comarca do Carballiño, e manter esta restrición en Ourense, onde xa estaba en vigor desde o pasado venres.
No caso concreto de Ourense e Barbadás os seus habitantes non poderán desprazarse fóra do seu termo municipal salvo por motivos laborais, educativos ou sanitarios.
Tamén en Ourense e Barbadás aplicaranse medidas de nivel tres, polo que estará prohibido que bares e cafetarías poidan servir no interior e limitaranse a atender en terrazas a grupos de cinco persoas máximo. E o restaurante poden servir no interior, a un máximo de cinco persoas por mesa.
Mentres, estarán en nivel dous os concellos das comarcas do Carballiño, Ourense, O Ribeiro, Allariz, Verín e O Barco de Valdeorras. Entre as restricións xerais inclúese a limitación dos aforamentos ao 50% nos establecementos comerciais, de restauración e hostalaría --onde ademais estará prohibido o consumo en barra--, así como en bibliotecas, academias, autoescolas e centros privados de ensino non regulado, entre outros.
Tamén se establece a limitación do número máximo de persoas nas reunións tanto privadas como na vía pública, fixado nun máximo de dez persoas; así como a redución dos aforamentos en celebracións, velorios e lugares de culto.
Sanidade indicou que o estudo do perfil dos casos de Covid-19 en Ourense reflicte que os contaxios céntranse fundamentalmente "no ámbito das reunións familiares de non convivientes". Todas estas medidas entran en vigor desde as 00,00 horas deste xoves, segundo concreta Sanidade, para actuar de "modo máis selectivo e con maior rapidez ante a aparición de casos nunha zona concreta".
