Trasladada ao hospital unha persoa tras un accidente ocorrido na A-52 á altura de Toén
Os feitos tiveron lugar sobre as 9 da mañá deste mércores.
Por E.P. | SANTIAGO DE COMPOSTELA | 21/10/2020 | Actualizada ás 11:56
Unha persoa foi trasladada ao Complexo Hospitalario Universitario de Ourense (CHUO) tras un accidente de tráfico ocorrido na A-52 á altura de Toén (Ourense).
O 112 Galicia detallou que os feitos tiveron lugar este mércores sobre as 9,10 horas, cando recibiu varios avisos dun accidente de tráfico que tivera lugar na A-52 ao seu paso pola parroquia de San Martiño de Alongos de Toén.
Así, informouse do ocorrido aos bombeiros do Carballiño, a Garda Civil de Tráfico, o equipo de Protección Civil da localidade e o servizo de mantemento de estradas.
Fontes do 061 explicaron a Europa Press que unha ambulancia de soporte vital básico do 061 desprazouse ao lugar para prestar asistencia a unha persoa que se atopaba aparvada debido ao suceso. Posteriormente, esta foi trasladada ao centro hospitalario de referencia.
