A Xunta promociona un exclusivo paquete de "turismo de golf" en tempos de pandemia

A Xunta promociona un turismo selectivo a través do golf en tempos de pandemia. Así, a través do proxecto 'GaliciaGolfSaúde' ofrece unha selección de campos de golf, aloxamentos e unha oferta termal e gastronómica orientada ao mercado luso e busca crear e consolidar unha rede hispano-portuguesa especializada.

A directora de Turismo de Galicia, Nava Castro, participou este martes na presentación telemática do proxecto, da man da Asociación Galicia Destino Golf, Viaxes Abramar e Oca Hotels a través do concurso de ideas promovido polo Clúster Turismo de Galicia.

A iniciativa está orientada cara ao nicho dos xogadores de golf, un colectivo de alto valor engadido polo gasto medio e a procura de destinos de calidade. Así, o obxectivo é impulsar unha ferramenta para facilitar contactos e crear unha rede de colaboración entre a oferta especializada en golf e en saúde en Galicia e os prescriptores lusos.

Segundo destacou Nava Castro, esta ferramenta é "froito da especialización e da diversificación" cara á que avanza a oferta turística galega e permite situar á comunidade nunha "mellor situación de competitividade".

A proposta está articulada nun primeiro bloque con seis campos de golf seleccionados, outra oferta agrupada de balneario hotel e campo, outro con propeutas de aloxamento en hoteis ou turismo e outro con axencias especializadas neste colectivo turístico.

Golfista nun campo de golf