Máis de 5.000 persoas dependentes en Galicia agardan en listas de espera a seren atendidas
Só dúas de cada 10 prazas de atención residencial a dependentes en Galicia son públicas, segundo CC.OO. O sindicato advirte de que "a covid pillou a este servizo con precariedade e recursos insuficientes".
Por Europa Press / Redacción | SANTIAGO DE COMPOSTELA | 17/11/2020 | Actualizada ás 12:36
Só dúas de cada 10 prazas de atención residencial a dependentes en Galicia son públicas, segundo os datos do sindicato CC.OO., que cifra en 17.652 as que están "en mans privadas", dun total que supera as 22.753.
A responsable de emprego da central, Maica Bouza, presentou este martes en rolda de prensa o informe 'O modelo de atención á dependencia en Galicia: prestacións e emprego'. Xunto a ela compareceron a auxiliar de axuda a domicilio Carmen Villar, presidenta do comité de empresa de Idades, quen criticou a ausencia dun protocolo unificado no sector para facer fronte á pandemia da covid-19, posto que estes chegaron "tarde, mal e por varias vías".
Villar, quen tamén asegurou que "as PCR non están a funcionar" neste sector e que unicamente se realizan cando un concello entra en nivel vermello de alerta. Denunciou, ademais, por mor da crise do coronavirus, a proliferación de "ERTE ilegais e unha chea de suspensións por parte de usuarios porque vían que non había material de prevención e tiñan medo a contaxiarse".
Sen estimación dos contaxios que se producen neste ámbito, pero coa convicción de que nalgunhas zonas o nivel de infeccións foi elevado, esta traballadora tamén lamentou condicións laborais e salarios baixos, polo que solicitou a apertura de "unha liña de diálogo" coa administración.
Xunto a elas, o portavoz de atención sociosanitaria de CC.OO., Alfonso García, avisou dunha "desprofesionalización" do sector e "fuxida cara a outros" ámbitos. Igualmente, reprochou a existencia de "persoais insuficientes", carencias en canto a material e instalacións e salarios "moi baixos", inferiores aos 1.000 euros.
"POUCO CONTROL E EXCESIVA CONCENTRACIÓN"
En Galicia, a datos a setembro, hai unhas 62.041 prestacións á dependencia recoñecidas e 5.219 en listas de espera, segundo as cifras do estudo de Comisións. O "resultado da lenta posta en marcha da lei e tamén dos recortes do PP en 2002", en palabras de Maica Bouza.
Bouza censurou que "no canto dunha aposta" por este servizo, o que se fixo foi "reasignar o tipo de prestacións que outorgaba aos solicitantes" e "cada vez máis (unha adxudicación de) as de máis baixo custo", como a "teleasistencia" e as "medidas de prevención". Estas son, dixo, "as máis baratas" e que se ofrecen "desde o sector público".
Con todo, advertiu de que "en mans da iniciativa privada" quedan "os servizos máis caros, como atención residencial", a pesar de que "a lei dicía que se priorizarían os servizos públicos". A xestión das residencias que eran da Xunta "foi privatizada", denunciou.
Neste escenario de "proliferación de empresas externas", reprobou que estas compañías que prestan servizos de atención á dependencia ven este campo "como un negocio". Son, asegurou, "multinacionais que actúan nun mercado de pouco control público, con grandes centros obsoletos, excesiva concentración e auténtica carencia de persoal".
"CONDICIÓNS LABORAIS DEPLORABLES"
Sinalou a DomusVi, "buque insignia das empresas privadas de atención á dependencia" e engadiu que o panorama "non é diferente" na axuda a domicilio, aínda que "neste caso" son firmas "máis nacionais que internacionais", pero que o que fixeron foi baixar as súas ofertas nas licitacións "sen renunciar a ter beneficios", o que repercutiu nas condicións do persoal.
"Este é o modelo de atención á dependencia", alertou, pola situación de "case 40.000 persoas que traballan no sector" e que sofren "emprego a tempo parcial maiormente, moitas veces temporal e con condicións laborais deplorables".
Así mesmo, incidiu en que "a covid pillou á atención á dependencia non só con precariedade e recursos insuficientes", senón que "puxo en evidencia as súas deficiencias". "Non hai protocolos, hai concentración de usuarios... Isto provocou en marzo e segue provocando que tanto os usuarios como os traballadores estean en absoluta desprotección", denunciou.
PLAN DE CHOQUE
Con este documento, CC.OO. pretende que o servizo de atención á dependencia ofreza "unha calidade óptima que non se está dando", tanto para usuarios como para profesionais. Para iso, pide "un plan de choque" que inclúa unha "auditoría covid", máis orzamento, "recuperar a xestión pública" de centros e dotalos de máis prazas, coordinación sociosanitaria do Sergas e redefinición dos centros segundo o grao de dependencia.
"Demandamos á Xunta a apertura urxente dunha mesa de diálogo social tripartito para analizar a situación e dar resposta á gravísima situación que se está vivindo", concluíu Maica Bouza.
