Anxo Angueira, o grande impulsor da universalización de Rosalía de Castro

Anxo Angueira, un dos grandes dinamizadores da cultura do país e, especialmente, da figura da gran Rosalía de Castro, ven de ser renovado como presidente da fundación que leva o nome da escritora. A súa elección polo plenario foi por unanimidade o que demostra o gran traballo que o escritor e profesor leva realizados durante estes anos.

Acompañarán a Angueira ao fronte da fundacón Ana Blanco como vicepresidenta; Xosé Carlos Beiró como secretario; Xosé García Lapido como tesoureiro; e como vocais Xosé Luís Axeitos, María López Sández e Chus Pato. 

Anxo Angueira foi elixido presidente desta entidade en 2012. Desde entón as visitas á Casa-Museo incrementáronse nun 260%: pasando de 8.655 a 22.463 en 2019. Asemade, a Fundación pasou dunha taxa de autofinanciamento do 20% en 2012 a un 45% en 2019, cifra considerable na nosa contorna cultural.

Froito da súa xestión é tamén a renovada musealización, catálogo e dixitalización de todo o fondo documental e do acondicionamento dunha sala para o arquivo, que xa está a disposición dos investigadores. Nestes anots tamén se incrementou o patrimonio do museo coa chegada de novos obxectos, artísticos ou non, como o cadro de Brocos e diferentes pezas de Ovidio Murguía e puxéronse en marcha ducias de actividades ao longo do ano: a homenaxe ao mundo do mar, o festival Abride a Fiestra, alén de múltiples exposicións, conferencias, roteiros, teatralizacións e visitas guiadas. 

Anxo Angueira Viturro (Manselle, Dodro, 1961) é doutor en Filoloxía Galega e profesor da Universidade de Vigo. No ámbito da creación literaria publicou obras poéticas e narrativas: Val de Ramirás (1989), O valo de Manselle (Xerais, 1996), Bágoas de facer illas (Xerais, 1997), Libro  da Vertixe (1997), Pensa nao (Premio Xerais de Novela 1999), Terra de Iria. Viaxe ó país de Rosalía de Castro (2002), A morte de A. (Xerais, 2003), Fóra do sagrado (Xerais, 2007) e Iria (2012).