Coñece cales son os traballos máis demandados polas empresas en época de crise
Son na área de alimentación, industria e IT. O soldo móvese entre os 14.000 e os 35.000 euros ao ano.
Por Europa Press / Redacción | SANTIAGO DE COMPOSTELA | 16/02/2021 | Actualizada ás 10:10
Perfís 'IT', operarios especializados, persoal de mantemento, comerciais ou enxeñeiros, sitúanse como os postos de traballo que máis custa cubrir na comunidade galega nestes momentos.
Así se desprende do 'informe Adecco sobre perfís deficitarios e escaseza de talento', no que se analizan aqueles perfís deficitarios no mercado de traballo e as razóns que están a levar a esta situación.
O documento indica que, a pesar dos máis de 3,9 millóns de desempregados que se rexistran no territorio estatal, quedan sen cubrir preto dun 9% de vacantes que existen actualmente nas compañías. En concreto, oito de cada dez empresas "recoñecen ter dificultades á hora de atopar talento", porcentaxe que "se disparou máis de 30 puntos porcentuais nos últimos 5 anos".
En Galicia, case todos os sectores afectados pódense agrupar na Industria, principalmente nas ramas de automoción, alimentación e o sector loxístico. Así mesmo, existen dificultades para recrutar persoal de mantemento industrial e enxeñeiros, ademais de perfís IT e comerciais.
ALIMENTACIÓN E INDUSTRIA
Na área de alimentación escasean os operarios/as especializados como cortadores/as de serra, fileteadores/as, carniceiros/as ou pescadeiros/as, pero tamén os inspectores/as de calidade. Tamén faltan peóns con experiencia en empacado e manipulación de produto fresco, unha escaseza xeral que se aprecia máis nas provincias de Pontevedra, A Coruña e Ourense.
"Estes profesionais son difíciles de atopar pola alta especialización do seu posto, porque as retribucións non sempre son satisfactorias para os candidatos/as e porque son postos de traballo con pouca atracción para xerar nova canteira", sinala Adecco.
Nalgunhas zonas "este é un problema perentorio", engaden, pois "a gran maioría do persoal" que cobre estas vacantes está próximo á xubilación e o ritmo de substitución é moito menor que a man de obra que se forma.
Na automoción, hai problemas para recrutar técnicos/as de mantemento con experiencia, e na área loxística faltan carretilleros/as, administrativos/as e repartidores/as.
En xeral, na industria galega costa atopar perfís como electricistas, electromecánicos/as, mecánicos/as navais e similares. A Coruña e Ourense son as rexións que máis demandan estes profesionais.
PERFÍS IT
Dentro dos perfís IT, os máis deficitarios son técnicos/as de soporte, desenvolvedores/as web, Full Stack developers (front e back) e perfís especializados en Big Data e/ou Business Intelligence. "Moitas empresas empezan a contratar profesionais cuxa formación non provén só da Universidade se non que optan pola formación a través de bootcamps ou de maneira autodidacta".
PINZA SALARIAL VARIADA
A pinza salarial na que se moven todos estes perfís "é moi variada", desde os 14.000-18.000 euros brutos anuais de mínimo que pode cobrar un peón no sector alimentario ata os 35.000 euros que reciben os enxeñeiros/as de calidade.
