Ciudadanos reclama que os funcionarios de prisións sexan axentes da autoridade tras a agresión na Lama
Tamén pide un protocolo de seguridade ante agresións, que "actualmente non existe".
Por E.P. | Santiago de Compostela | 16/02/2021 | Actualizada ás 14:45
A coordinadora de Ciudadanos en Galicia, Beatriz Pino, reclama que os funcionarios de prisións "sexan considerados axentes da autoridade" e un protocolo de seguridade ante agresións, que "actualmente non existe". Así o pide Pino despois de que a pasada fin de semana un preso agredise a cinco traballadores do centro penal da Lama (Pontevedra) que foron derivados a un servizo de urxencias.
Para a líder de Cs, este episodio "pon en evidencia a necesidade de que os funcionarios de prisións sexan considerados axentes da autoridade.
Pino tamén lembra que o partido "leva moito tempo insistindo" en atender esta reclamación dos funcionarios destes centros que, ademais, están "saturados": "Os cadros de persoal son insuficientes e os traballadores non contan con medios de autoprotección suficientes".
De feito, no caso de que sexan considerados axentes de autoridade, "poden ter un plus de garantía na súa situación, sobre todo en caso de producirse actos violentos por parte dos reclusos", explicou a responsable de Cs en Galicia.
Ademais, criticou que aínda "non existe un protocolo" con medidas preventivas ante estas situacións nin tampouco "un sistema sancionador e disciplinario claro" para os agresores.
