O PP dá 24 horas á oposición para pactar o seu plan forestal que fomenta o eucalipto e o piñeiro
PPdeG destaca a vontade de Medio Rural de alcanzar un "consenso" sobre un decreto que xa ten "un número amplo" de propostas do sector.
Por Europa Press / Redacción | SANTIAGO DE COMPOSTELA | 22/02/2021 | Actualizada ás 17:38
OS tres grupos con representación no Parlamento galego --PPdeG, BNG e PSdeG--, terán 24 horas, entre este martes e este mércores, para manter contactos sobre posibles transaccións á revisión do plan forestal da Xunta, que se debaterá e votará no pleno desta semana.
Así o avanzou este luns en rolda de prensa o portavoz do PPdeG na Cámara, Pedro Puy, quen apelou ao "consenso" que pide o sector forestal para darlle unha "boa planificación" que teña "continuidade no tempo.
Puy explicou que na sesión deste martes haberá un primeiro debate do plan, remitido pola Consellería do Medio Rural ao Parlamento, e a partir de aí abrirase un prazo "de 24 horas" para que os grupos poidan "chegar a acordos sobre as transaccións" que se poidan realizar ao texto para á votación final, que se producirá o mércores.
Neste sentido, o portavoz parlamentario do PPdeG destacou que a Xunta escollese esta fórmula como unha "mostra máis de atender á necesidade do sector forestal" de que sexa "consensuado", xa que se trata dun decreto do Goberno galego que non precisa ratificación parlamentaria.
UN PLENO "INTENSO"
O desta semana será un pleno "intenso" que abordará "moitos temas" de actualidade. De feito, Puy destacou que na orde do día tamén estará incluída a lei para a reactivación económica de Galicia e a lei de acción exterior, ambos os textos remitidos pola Xunta ao Lexislativo.
