O BNG chama a atención sobre a falta de profesores para os nenos con necesidades educativas especiais

A portavoz nacional do BNG, Ana Pontón, avanzou unha batería de iniciativas parlamentarias nas que reclamará á Xunta o aumento de profesores e especialistas en pedagoxía terapéutica para a atención nas aulas de nenos con necesidades educativas especiais. En rolda de prensa tras unha reunión con representantes de Down Galicia, Pontón denunciou "incidencias" neste curso escolar polos "recortes" de profesorado de apoio e especialista, o que provoca unha "desatención" de alumnos que "non teñen o apoio que necesitan".

Así, require unha "integración real" destes alumnos que non traballan con material específico os mesmos contidos que o resto de compañeiros, senón que sofren "derivacións moi importantes" a centros de educación especial, o que "vai en contra dunha educación inclusiva de calidade". Tamén lamenta que nos recreos "non se realiza ningún tipo de mediación" para a integración destes estudantes. Alerta de que é "moi preocupante" a súa situación, "a pesar da propaganda da Xunta", pois non se cumpren os cocientes de docentes, salvo en cuarto de Educación Infantil, e non se cobre o déficit de especialistas pedagóxicos.

Incide en que "falta moito camiño por percorrer" para unha educación "realmente integradora e inclusiva". Chama a atención sobre o feito de que "moitos orientadores" teñen que atender varios centros á vez, o que "dificulta a valoración de necesidades dos nenos", cunha "peor situación" do alumnado que precisa especialistas en pedagoxía terapéutica, xa que moitos centros "carecen" desta figura. Neste sentido, o Bloque avoga por desenvolver plans e programas estables para complementar as necesidades educativas de alumnos máis vulnerables e que "non se segregue".