Feijóo, sobre a posible falsificación de obras de Seoane: "Preocupa, e máis se se trata de artistas galegos"
Un informe da Fundación do autor cuestiona a autoría de 18 obras expostas nunha mostra en Lalín.
Por Europa Press / Redacción | Santiago de Compostela | 08/04/2021 | Actualizada ás 19:55
O presidente da Xunta, Alberto Núñez Feijóo, trasladou, ao ser preguntado polas dúbidas suscitadas ao redor da autoría dunhas obras expostas nunha mostra en Lalín de Luís Seoane, a "preocupación" da Administración galega por esta cuestión.
"Seguimos con moito interese as informacións, preocúpanos e preocúpanos adicionalmente que se produza en Galicia e máis se trata de artistas galegos como Luís Seoane", admitiu.
Neste contexto, dixo que cando se lles pida "información", en caso de posibles trámites xudiciais, ou "opinión" a Administración galega estará a disposición deste requirimento.
En concreto, un informe da Fundación Luís Seoane, con sede na Coruña, cuestiona a autoría de 18 obras expostas na exposición 'Creacións máxicas de medidas exactas. Maruja Mallo e Luís Seoane en Buenos Aires (1936-1965)', en xaneiro do ano pasado en Lalín.
A mostra foi organizada polo Concello de Lalín e contou co apoio da Xunta. As informacións sobre as dúbidas na autoría destas obras levaron ao padroado da Fundación Luís Seoane a convocar unha reunión o pasado mércores, na que se acordou realizar un inventario con toda a obra coñecida do artista.
