Alarma no centro da Coruña por un lume xa sufocado na Praza de María Pita
O incendio iniciouse durante uns traballos de rehabilitación.
Por Europa Press / Redacción | A CORUÑA | 22/04/2021 | Actualizada ás 21:06
Os Bombeiros da Coruña sufocaron un incendio que afectou a un edificio da praza de María Pita e que se iniciou durante uns traballos de rehabilitación, segundo informaron a Europa Press fontes municipais. O lume causou alarma no centro da cidade ata que foi sufocado.
Pola súa banda, desde o 112 precisaron que recibiron a chamada de varias persoas alertando de que saía fume dunha vivenda, un aviso que se produciu sobre as 19,00 horas. Desde o servizo de emerxencias, deuse traslado da alerta aos Bombeiros, a Urxencias Sanitarias de Galicia-061; a Protección Civil e á Policía Local, que se desprazaron ata o lugar.
As fontes consultadas por Europa Press explicaron que o incendio, que se produciu nun edificio situado na praza, na esquina con Rega de Auga, orixinouse durante unha obra xa que no edificio están a facerse traballos de rehabilitación.
En concreto, dixeron que foi durante o traballo que estaban a realizar uns pintores e que ardeu unha parte da galería provocando o fume do que alertaron os veciños. Á marxe dos danos materiais, confirmaron que non había feridos e que no edificio non había persoas no seu interior.
