Guerra aberta entre os traballadores e Ence entre acusacións de falta de produción de madeira

O Comité de Empresa de Ence rexeitou as afirmacións lanzadas este xoves pola compañía defendendo a nula temporalidade do persoal fixo e negando problemas de subministración de madeira. Matizan que se referían ao persoal eventual e tachan de "descaro maiúsculo e flagrante" a negación da problemática coa madeira, "cando todos os traballadores levan semanas vendo reducida a produción".

Segundo indican nun comunicado, referíanse á rotación e temporalidade do persoal eventual, "do cal é sobradamente coñecido o sistema de contratación por días, semanas ou no mellor dos casos meses con nula previsión e alta rotación de varias persoas no mesmo posto para evitar ter que facelos fixos".

Consideran esta situación unha "potencial situación de fraude". "Se queren falar da rotación do persoal fixo podemos expor a situación do persoal fixo descontinuo no último ano e a cobertura do seu posto por persoal eventual cando finalizan os seus chamamentos", sinalan. Da mesma forma, aseguran que a formación deste persoal é "máis que deficiente e irregular", sendo habitual a situación de eventuais formando a outros eventuais que van ocupar o seu posto e nunhas marxes de tempo moi variables.

Respecto da taxa de absentismo laboral, apuntan que a compañía considera os permisos retribuídos recoñecidos por Lei ou polo Convenio Colectivo por cuestións como maternidade, paternidade, lactación, permisos sindicais ou o recente permiso de coidados por enfermidade grave, ingreso hospitalario ou accidente de familiares ata segundo grao, así como as vacacións non gozadas. Sobre isto, acusan á empresa de pór "trabas e coaccións" para que se puidesen gozar.

SALARIOS

Afean tamén que "presuman" de que o salario medio do persoal da fábrica son 57.000 euros, así como que a compañía aposta pola conciliación persoal pola xornada laboral anual. "Convidamos á empresa a expor o salario modal ou máis frecuente do persoal en lugar do salario medio bruto, pois no primeiro caso é facilmente comprobable polas táboas salariais públicas do convenio e no segundo inclúen un considerable número de postos directivos e contratos de condicións individualmente pactadas que superan exponencialmente as remuneracións comúns do persoal da fábrica", animan.

Outro punto que critican é o índice de accidentalidade do que, din, presume a empresa, "moi por baixo da media do sector in A empresa presume dun índice de accidentalidade moi por baixo da media do sector industrial e de baixa frecuencia.