Santiago terá un monte de 20 hectáreas de castiñeiros e carballos no rexistro de masas autóctonas
Unhas 20 hectáreas do monte Neiro, compostas por castiñeiros e carballos, poderían entrar a formar parte do Rexistro de Masas Consolidadas de Frondosas autóctonas, que pretende favorecer a protección deste tipo de plantacións
Por Europa Press / Redacción | SANTIAGO DE COMPOSTELA | 18/05/2021 | Actualizada ás 12:02
Unhas 20 hectáreas do monte Neiro, en Santiago de Compostela, compostas por castiñeiros e carballos iniciaron a súa tramitación para entrar a formar parte do Rexistro de Masas Consolidadas de Frondosas autóctonas, que pretende favorecer a protección deste tipo de plantacións.
A inclusión desta superficie no rexistro foi publicada este martes no Diario Oficial de Galicia (DOG) e, a partir deste mércores, quedará aberto o prazo para a presentación de alegacións, segundo informa a Administración autonómica nun comunicado. Así, a declaración afecta a 20,71 das 35,45 hectáreas que compoñen esta masa forestal situada na parroquia de Vilamaior da capital galega.
O do monte Neiro é un dos 30 expedientes que a Consellería do Medio Rural tramita na actualidade para a súa inscrición no rexistro de masas consolidadas. En total, suman unhas 1.900 hectáreas repartidas por catro provincias: seis montes son na Coruña, oito en Lugo, nove en Ourense e sete en Pontevedra.
De superar a súa tramitación, estas masas sumaríanse a outras 19 que xa forman parte do inventario. Trátase de 1.550 hectáreas situadas tamén no catro provincias --A Coruña (2), Lugo (8), Ourense (4) e Pontevedra (5)--.
