"Percebes e Grelos" recibe o Premio Marcela e Elisa por ser "exemplo de visibilidade" do colectivo bisexual
O fotógrafo e director de cinema Lázaro Louzao acudirá ao acto para recoller o seu premio da edición anterior, cancelada pola pandemia.
Por Europa Press / Redacción | Compostela | 05/06/2021 | Actualizada ás 12:34
A recoñecida 'youtuber' Carolina Igrexas recollerá este luns o XVII Premio Marcela e Elisa que lle outorga a Asociación pola Liberdade Afectiva e Sexual (Alas) por ser exemplo de visibilidade para a mocidade e para o colectivo bisexual en particular. Será a persoa máis nova en recoller este galardón.
O colectivo destaca de 'Percebes e Grelos', como é popularmente coñecida a presentadora, guionista e comediante, "o seu testemuño como vítima de 'bullying' e as súas campañas en prol do coidado da saúde mental". Para Alas, os seus esforzos para dar visibilidade a estas situacións "fana merecedora desta distinción".
Ademais de Carolina Igrexas, o fotógrafo e director de cinema Lázaro Louzao tamén acudirá ao acto de entrega do premio para recoller o seu galardón da edición XVI, que non puido ser celebrada a consecuencia da emerxencia sanitaria derivada da pandemia.
Louzao recibirá esta distinción polos "múltiples méritos" que detalla a asociación Alas da súa obra, entre os que menciona "a realización da primeira longametraxe de temática LGTBI en galego", "a súa maneira de retratar o espido masculino sen prexuízos nin censuras" ou "a recuperación da memoria das vítimas do Holocausto".
HOMENAXE Á CULTURA
A Asociación pola Liberdade Afectiva e Sexual da Coruña celebra con esta entrega de premios a volta gradual á presencialidade nos seus actos, interrompida polo coronavirus. Desde Alas tamén "se quere render unha homenaxe ao mundo da cultura, que tan afectado se viu pola pandemia".
Despois da entrega de premios, que se celebrará o 7 de xuño no Centro Cívico de Os Mallos, tanto Carolina Igrexas como Lázaro Louzao uniranse á lista de personalidades galardoadas por Alas, na que se atopan, entre outras, a compañía de teatro A Panadaría --encargada de levar aos escenarios a obra 'Elisa e Marcela'-- ou a Asocación de Mulleres Deportistas Galegas.
