Feijóo avoga por sumar empresarios e universidades á Eurorrexión, que captou 163 millóns de Europa en catro anos

O presidente da Xunta, Alberto Núñez Feijóo, mostrouse este mércores partidario dunha Eurorrexión Galicia-Norte de Portugal "máis ampla", coa agregación de empresarios e universidades ás súas dinámicas; "máis protagonista", transmitindo o "papel esencial" das rexións na conferencia sobre o futuro de Europa; e tamén "máis extensa".

Así o manifestou en Salvaterra de Miño (Pontevedra), no acto no que o titular da Xunta traspasou a presidencia da Comunidade de Traballo de Galicia e Norte de Portugal a Antonio Cunha, tras catro anos de mandato, que arrincaron en maio de 2017 e dos que o dirixente galego fixo un balance "frutífero".

"Hoxe traspasamos a presidencia satisfeitos por presentar un balance frutífero en innovación, sustentabilidade e mobilidade, e convencidos de que terá continuidade", dixo o xefe do Executivo galego, antes de destacar que, baixo o mandato de Galicia, impulsáronse 85 proxectos que están en execución e que permitiron captar 163 millóns de fondos europeos.

E aínda que con "maior" implicación por parte do Estado luso, Feijóo tamén situou o compromiso dos Gobernos portugués e español coa alta velocidade Lisboa-Porto e Porto-Vigo-a Coruña como "a maior achega" que a Eurorrexión logrou nos últimos anos.

Pola súa banda, na súa intervención, Cunha destacou o balance dos últimos anos e comprometeu todo o esforzo de "un europeísta convencido" --como se definiu-- para dar continuidade ao labor.

DÉBEDA

Por outra banda, o presidente da Xunta manifestou este mércores que España "se está endebedando cunha intensidade" que lle "preocupa" e, tras advertir que "todas as débedas se acaban pagando", considerou que na actual conxuntura marcada pola pandemia é necesaria "unha boa" política económica expansiva, pero tamén "rigorosa" no gasto corrente.

Á espera de ver os resultados da reunión do Consello de Política Fiscal e Financeira (CPFF), o presidente galego asegurou que, segundo lle trasladou o conselleiro de Facenda, Valeriano Martínez, na súa última conversa, as comunidades acudían a este encontro sen contactos previos co Ministerio e sen saber "con claridade" que se ía pór "sobre a mesa".

O que pediu Feijóo é que se concreten "cifras" para que as autonomías que, como Galicia, teñen "estabilidade" política, poidan elaborar os seus orzamentos "en orde e prazo", co fin de que as contas para o próximo exercicio de 2022 poidan estar operativas a principios do ano que vén.

"Espero tamén unha formulación razoable por parte do Goberno con respecto ao sistema de financiamento actual", agregou, antes de insistir en que é necesario impulsar unha política expansiva en investimento e "responsable" no gasto corrente.