Unha asociación pide reabrir a mina de Touro a pesar dos danos ambientais advertidos pola Xunta
Alegan que supón unha "oportunidade" para a "reactivación" económica e demográfica da zona.
- Fotogalería: A mina O Pino-Touro, un desastre ambiental difícil de ocultar
- Os informes para denegar a mina de Touro detectaron afectación en oito ríos e riscos para poboacións e animais
Por Europa Press / Redacción | SANTIAGO DE COMPOSTELA | 01/08/2021 | Actualizada ás 14:52
A Asociación Plataforma Mineiros de Touro e O Pino, así como os concellos de ambas as localidades, reclaman a reapertura da "histórica" mina debido a que supón unha "oportunidade" para a "reactivación" económica e demográfica do lugar.
Segundo explicou a asociación nun comunicado, o proxecto mineiro é "solvente" e, ademais de crear postos de traballos, contribuiría á "innovación" da comunidade rural. Unhas demandas que chocan coas fortes mobilizacións veciñais desenvoltas nos últimos anos nos mesmos concellos para frear a reapertura da mina.
Asociación e Concellos instaron á empresa mineira Atalaia Mining --encargada da obra-- a que presente un novo proxecto e a documentación "requirida" ante a Administración, para "axilizar" o proceso. Así mesmo, demandaron á Administración que "teña en conta á xente local" e que non "mire cara a outro lado" cando determinados colectivos utilicen a "manipulación e verdades a medias" para conseguir paralizar o proxecto.
"ESPAÑA BALEIRADA"
Por outra banda, a asociación utilizou o termo de "España baleirada" --zonas rurais que quedan despoboadas-- para referirse a pobos como Touro e O Pino. Neste sentido, aseguraron que "está en xogo" a "mellora" das condicións ambientais e socioeconómicas da contorna. Tamén reclamaron aos colectivos contrarios á reapertura da mina a que traten o tema "con rigorosidade", xa que eles tampouco queren que "o rural desapareza" e é por iso que tampouco desexan que quede "sen comercio, industria e xente".
