Persoas xordas poderán gozar este domingo do concerto de Bush Doctors

O Noroeste Estrela Galicia impulsa, en colaboración coa Asociación Cultural Negus e Acopros, a accesibilidade, ao achegar a cultura a persoas con capacidades diversas. Segundo informa, faise mediante a implantación de medidas de accesibilidade nun dos concertos enmarcados dentro desta 34 edición do festival. Así, varias persoas xordas ou con implante coclear poderán gozar tamén da música a través de vibracións.

Será durante o concerto de Bush Doctors do domingo día 8, ás 13,00 horas, onde dúas persoas usuarias de Acopros, Asociación de Colaboración e Promoción do Xordo, utilizarán dúas mochilas vibratorias para gozar do concerto desta banda galega, en colaboración coa Asociación Cultural Negus. A organización apunta que non é a primeira vez que se utilizan este tipo de mochilas en concertos, pero si é novidade no Festival Noroeste Estrela Galicia.

Nesta liña de accesibilidade de persoas con capacidades diversas nos actos culturais, como noutras edicións manterase a reserva de espazos específicos para que as persoas con mobilidade reducida tamén asistan aos concertos con comodidade.

Persoa xorda cunha mochila vibratoria gozando dun concerto - Europa Press