A Xunta defende que o próximo curso haberá máis unidades de infantil e primaria que antes da pandemia
"Teremos todas as unidades precisas para dar resposta ás necesidades do sistema educativo o próximo curso", destaca Educación.
Por Europa Press / Redacción | SANTIAGO DE COMPOSTELA | 06/08/2021 | Actualizada ás 13:43
A Xunta de Galicia sostén que o próximo curso 2021/22 haberá "máis unidades en Infantil e Primaria que no curso anterior á pandemia, 2019/20". "Isto, a pesar da a caída de matrícula nuns 6.000 alumnos nestas etapas", engade despois das críticas a este respecto por parte de asociacións de pais e sindicatos.
Faino tras a publicación no Diario Oficial de Galicia (DOG) da modificación do catálogo de unidades que "confirma, ademais, que se manteñen abertas todas as escolas unitarias en funcionamento", defende a Administración galega.
Respecto diso, a Consellería de Cultura, Educación e Universidade argumenta que se dispón de "todas as unidades precisas para dar resposta ás necesidades do sistema educativo o próximo curso". "Deste xeito, terá todos os postos escolares e o cadro de persoal de profesorado para garantir os máximos estándares de calidade do ensino, a pesar da tendencia de diminución do alumnado".
En concreto, argumenta un incremento de 191 unidades no próximo curso respecto ao último curso previo á pandemia (2019/20)"a pesar de perder nese período 6.000 alumnos". "Independentemente deste descenso demográfico, a Xunta de Galicia segue apostando polo reforzo e estabilización dos persoais de profesorado", engade a Consellería que alude ás oposicións de educación con case de 4.000 prazas e a aprobación dunha nova oferta de emprego para o próximo ano con outras 1.600
ALUMNOS POR AULA
O Goberno galego asevera que mantén, ademais, "os cocientes establecidas pola normativa estatal para Infantil e Primaria, de 25 alumnos por aula".
De feito, destaca que "Galicia mellora ese cociente, dado que ten o mellor cociente alumno/profesor de España xunto a Estremadura (9,2 fronte á media estatal de 11,3)". "Así mesmo, o 70% das aulas de Infantil e Primaria da nosa Comunidade teñen 20 alumnos ou menos e o 30% teñen 10 alumnos ou menos".
Por outra banda, lembra que próximo curso non hai cambios no protocolo covid de Primaria determinado polos Ministerios de Sanidade e Educación, polo que se manteñen os grupos burbullas e as principais medidas previstas para o conxunto das comunidades autónomas.
