Muxía prohibe o consumo de auga do abastecemento municipal e corta a subministración por bacterias

O Concello de Muxía prohibiu o consumo de auga do abastecemento municipal e cortou a subministración tras confirmar análises realizadas a "aparición de bacterias na auga nuns valores non adecuados para o consumo directo pero si para a súa utilización no aseo persoal e similares".

Segundo informou este venres o Concello de Muxía, aínda se descoñece "a orixe" da aparición destas bacterias na auga detectadas pola analítica realizadas despois de que un "importante número de veciños" resultase afectado con síntomas de gastroenterites.

Aínda que as análises realizadas na xornada deste xoves nun principio deron "valores normais", a empresa contratada especializada que seguiu coas analíticas comunicou, tras obter os resultados máis pormenorizados na mañá deste venres, a "aparición de bacterias na auga nuns valores non adecuados para o consumo directo".

Tras ter constancia destes datos, pero "sen obter os resultados definitivos", o grupo de goberno decidiu prohibir o consumo de auga do abastecemento municipal.

LIMPEZA

Así mesmo, o Concello explicou que operarios do departamento de augas municipais levarán a cabo "o baleirado de todos os depósitos de auga, a limpeza e a desinfección cos protocolos que marcan estes procesos". "Todos os traballos levarán a cabo baixo a supervisión da empresa contratada e especializada neste ámbito", abunda.

Respecto diso, explicou que o Concello decidiu cortar a subministración de auga municipal, "sabendo das molestias que poidan ocasionar", puntualiza, ata que se termine con todo o proceso de limpeza e ata que a auga "teña valores óptimos para o consumo", apostila.

Tamén resalta o goberno municipal que comunica "en todo momento" os datos e procedementos a seguir "mediante documentación certificada" á Consellería de Sanidade.
Con todo, o Consistorio puntualizou que tomou estas medidas "para prevalecer a saúde dos veciños de Muxía". Ademais, xestiona con empresas o abastecemento de auga embotellada "para garantir" aos habitantes o seu consumo.

"Lamentamos profundamente todas as molestias ocasionadas e seguiremos traballando para dar solucións con moita brevidade", conclúe.

SANIDADE

A Consellería de Sanidade continúa coa "investigación epidemiolóxica e ambiental" ante a sospeita dun "brote de enfermidade de orixe alimentaria".

Segundo fontes da Consellería de Sanidade, este pasado xoves recolléronse mostras en distintos puntos de abastecemento de Muxía, tras detectarse numerosos casos de veciños con síntomas de gastroenterites.

Entre outros parámetros, aclaran as mesmas fontes sanitarias, determinarase se se trata de "E. coli, Norovirus ou Clostridium Perfringens". O Laboratorio de Saúde Pública "é o encargado de realizar as análises", cuxos "resultados finais", puntualizaron, "tardan un mínimo de 48 horas".