Caballero reivindica os seus 4 anos de liderado e aposta por un PSdeG "libre de ataduras e que non manexe ninguén"
O secretario xeral socialista visita A Baña e denuncia o "abandono" da Xunta co rural.
Por Europa Press / Redacción | SANTIAGO DE COMPOSTELA | 03/10/2021 | Actualizada ás 17:19
O secretario xeral do PSdeG, Gonzalo Caballero, reivindicou os seus catro anos de mandato e, de face ás primarias do próximo 30 de outubro, nas que tentará revalidar o cargo, dixo que aposta por un partido "libre de ataduras" e "que non manexe ninguén".
En declaracións aos medios durante un encontro coa militancia na Baña (A Coruña), volveu a defender que a súa proposta buscará "manter un PSdeG galeguista, de esquerdas, ecoloxista e feminista". "Avanzar, non retroceder". Esa é a idea que busca transmitir Caballero na campaña para unhas primarias nas que se enfrontará ao secretario provincial e presidente da Deputación da Coruña, Valentín González Formoso.
Así, Gonzalo Caballero sacou peito dos últimos catro anos, nos que o PSdeG "avanzou" e "está moito mellor". O seu proxecto, dixo, é o dunha "alternativa ao PP" que "non quere ningún tipo de conivencia nin de pasteleo" co presidente da Xunta, Alberto Núñez Feijóo, que "tan mal está a gobernar" Galicia e "tanto está a desfacer nos servizos públicos no rural".
"Eu respecto á outra candidatura", asegurou, aínda que considera que o PSdeG-PSOE "ten que seguir avanzando pola esquerda, polo progresismo, coa militancia e non ir a modelos máis conservadores".
O "ABANDONO" DO RURAL GALEGO
O secretario xeral dos socialistas galegos visitou este domingo A Baña en compañía do alcalde, José Antonio Pereira, con quen falou do "abandono" que a Xunta somete ao rural da Comunidade. Neste contexto, Caballero reclamou ao Goberno autonómico políticas a favor do rural para que "todos os cidadáns teñan os mesmos dereitos".
"Feijóo prometía que ía ser a lexislatura do rural e Feijóo está a liquidar o rural, permitindo unha mutilación financeira que deixa a un concello como A Baña sen oficina bancaria", denunciou. Precisamente, o rexedor cargou contra o peche "definitivo" dunha sucursal no municipio, que obrigará aos veciños a desprazarse a concellos limítrofes para poder empregar este servizo.
Ademais, Pereira queixouse dos "máis de sete parques eólicos que se queren instalar" no seu concello. "Empezamos a estar fartos de que se abuse do rural. No rural queremos vivir tranquilos", incidiu o alcalde da Baña.
