O Plan Hidrolóxico Galicia Costa recibe sete alegacións da asociación ecoloxista Arco Iris

A asociación ecoloxista Arco Iris presentou un total de sete alegacións ao Plan Hidrolóxico Galicia Costa, un documento que tacha de "insustancial" que "peca dunha calculada ambigüidade e falta de concreción" en aspectos que considera "básicos".

Así o sinalou a asociación nun comunicado remitido aos medios, no que sinala que o texto "non inclúe entre as súas medidas o establecemento dos caudais ecolóxicos mínimos, ao contrario que o proposto pola Confederación Miño-Sil, que especifica textualmente eses caudais por tramos fluviais e por estacións anuais".

"É incomprensible que Augas de Galicia deixe para mellor ocasión un compromiso básico de calquera Plan Hidrolóxico e aposte por un Plan B, no que non está garantida a participación das entidades ambientalistas, senón unicamente a dos interesados", censura Arco Iris.

Así mesmo, a entidade critica que o departamento autonómico "non aposte de forma decidida por unha moratoria indefinida para novos proxectos de minicentrais", cuxa presenza nos ríos da conca asegura que "é xa intolerable e representa un impacto ambiental inasumible"

Ante iso, espera que a Xunta "recapacite e reflexione" sobre a "inconsistencia" dun plan que, na súa opinión, "non responde en absoluto aos requirimentos do cambio climático", que "require instrumentos de xestión moito mais ambiciosos e consensuados coa sociedade".

Encoro de Belesar, preto dos Peares.