Corentena obrigatoria para os contactos dos infectados coa variante ómicron
Deberán cumprir igualmente corentena as persoas con inmunodepresión e os contactos daqueles casos nos que se sospeite unha transmisión a partir de visóns
Por Europa Press / Redacción | Madrid | 01/12/2021 | Actualizada ás 20:13
O Ministerio de Sanidade actualizou este mércores o seu documento de 'Estratexia de Detección Precoz, Vixilancia e control de COVID-10' para establecer que todas as persoas que tivesen contacto con algún caso de ómicron, tamén as vacinadas, deberán gardar corentena, do mesmo xeito que quen o tiveron con infectados polas variantes beta e gamma.
"A confirmación do tipo de variante non adoita estar dispoñible no momento do diagnóstico, polo que esta medida debe aplicarse tamén a aqueles casos nos que exista sospeita ben por información preliminar a través de PCR específica ben porque o caso forme parte dun gromo que inclúa casos producidos por ditas variantes", engade o documento.
Ademais, establece que deberán cumprir igualmente corentena as persoas con inmunodepresión e os contactos daqueles casos nos que se sospeite unha transmisión a partir de visóns.
O Ministerio de Sanidade implementou as prestacións do sistema de xestión dos controis sanitarios de entrada a España 'Spain Travel Health' (SpTH), incorporando as medidas de control aprobadas polo Goberno fronte á variante ómicron da COVID-19.
Tal e como explicou o secretario xeral de Saúde Dixital, Información e Innovación do Ministerio de Sanidade, Juan Fernando Muñoz, desde este sábado, mesmo día en que se publicaron no BOE, o SpTH incorpora as medidas de aplicación aos viaxeiros procedentes dos sete países declarados de alto risco (Sudáfrica, Botsuana, Eswatini, Lesotho, Mozambique, Namibia e Zimbabue).
Así, permítese á autoridade sanitaria española contar coa rastrexabilidade dos viaxeiros de voos procedentes ou que estivesen nestes países nos últimos 10-15 días, e para os que se habilitou un itinerario de control específico fronte á COVID-19 e a variante ómicron, consistente na petición de vacinación e proba de detección de infección activa (PDIA), realización de test de antíxenos á chegada a España e corentena obrigatoria de 10 días.
Esta mesma fin de semana e, coa entrada en vigor das novas medidas de control sanitario contidas na Resolución da Dirección Xeral de Saúde Pública publicadas no Boletín Oficial do Estado, controlouse a unhas 275.000 persoas: 140.000 que chegaron a España o sábado 27 de novembro e outras 135.000 o domingo, día 28.
Por outra banda, o Ministerio de Sanidade, a través dun documento do Centro de Coordinación de Alertas e Emerxencias Sanitarias (CCAES) que dirixe o doutor Fernando Simón, recomendou establecer límites no número de participantes en eventos sociais e públicos, "especialmente durante as celebracións das festas do Nadal", "debido ao contexto epidemiolóxico actual" e "as incertezas asociadas á variante ómicron", ademais dunha "posible diminución da efectividade vacinal co tempo".
