A Baña terá o alcalde do PP que estivo 24 anos co apoio de Compromiso por Galicia

O popular Andrés García Cardeso recuperou este martes a Alcaldía do municipio coruñés da Baña tras prosperar a moción de censura contra o ata agora rexedor José Antonio Pereira (PSOE) grazas aos votos dos dous edís de Compromiso por Galicia.

O debate da moción, rexistrada a finais de novembro polo PP e Compromiso por Galicia --que suman seis dos once edís da corporación da comarca da Barcala--, tivo lugar na mañá deste martes.

García Cardeso recupera así o bastón de mando que xa ostentou durante 24 anos, entre 1995 e 2019, cando o socialista José Antonio Pereira fíxose coa Alcaldía ao contar co apoio dos dous edís de CxG, claves agora para que os socialistas, con cinco concelleiros, perdan o goberno en favor dos populares, que teñen seis asentos na corporación local.

Compromiso por Galicia integrarase ata o final do mandato no novo goberno encabezado por García Cardeso, no que asumirá áreas pendentes de definir pero entre as que estarán, como mínimo, as de deportes e educación e cultura, segundo fontes consultadas por Europa Press.

O novo rexedor mostrou a súa satisfacción polo seu regreso á alcaldía e defendeu o paso dado ante "a deterioración global" que, a ollos de García Cardeso, atravesa A Baña desde a chegada ao executivo local dos socailistas, aos que afea a súa actitude de "desprezo total" cara á oposición

Tamén pon o foco nesta suposta falta de "diálogo" o portavoz de Compromiso por Galicia, César Ramos, quen, consultado por Europa Press, incide en que a formación que encabeza "regalou a cambio de nada" en 2019 a Alcaldía a Pereira, de quen asegura que "nunca quixo" materializar un "pacto de goberno real".

Por iso, subliña que a moción de censura está xustificada a pesar de estar impulsada por dúas formacións "diametralmente opostas" no ideolóxico, aínda que, segundo Ramos, comparten a necesidade de "sacar adiante" cuestións como os orzamentos municipais, prorrogados desde 2017; evitar a "perda" de subvencións ou liquidar o conflito aberto co persoal municipal.

Así as cousas, os socios de goberno celebrarán este mércores unha reunión para perfilar a repartición de responsabilidades do novo goberno da Baña que pretende, como recalcan García Cordeso e César Ramos, "dar un xiro" á situación do municipio.

PEREIRA: A MOCIÓN "NON TEN SENTIDO"

O alcalde saínte, José Antonio Pereira, que recibiu o respaldo da dirección do seu partido, manifestou que a moción, a pesar de ser un mecanismo "lexítimo" e "lícito", "non ten sentido" neste caso ao ser exposto por dúas organizacións políticas "con ideoloxías distintas".

Así, considera que o obxectivo do movemento entre PP e Compromiso é evitar que o PSOE "termine a lexislatura" á fronte do concello para impedir que, desta forma, "consolide os proxectos" articulados durante os últimos dous anos e medio.

Ao termo da sesión e unha vez confirmada a perda da Alcaldía por parte do PSOE, o secretario xeral dos socialistas galegos, Valentín García Formoso, cualificou o regreso de García Cardeso como "unha volta ao pasado que non respecta o cambio que pediron os veciños da Baña nas últimas eleccións muncipales nin os avances para o concello dos dous últimos anos".