Galicia rexistrou no 2021 a menor cifra de afogados en sete anos
Contabilizáronse 17 falecidos, 25 menos que en 2020.
Por E.P. | SANTIAGO DE COMPOSTELA | 11/01/2022 | Actualizada ás 12:32
Os afogamentos mortais descenderon durante 2021 en catorce comunidades autónomas. Entre elas destaca Galicia que, con 17 falecidos, contou con 25 vítimas menos que o pasado exercicio, cando se rexistraron 42 casos. Así o reflicten os datos do Informe Nacional de Afogamentos (INA) de 2021, da Real Federación Española de Salvamento e Socorrismo. O pasado ano un total de 260 persoas perderon a vida nos espazos acuáticos españois fronte ás 338 de 2020.
Trátase da menor cifra no últimos sete anos e a primeira vez que estas cifras baixan a barreira das 300 mortes desde que esta entidade elabora o documento. Ademais de en Galicia, os principais descensos déronse en Comunidade Valenciana (43 fronte a 61); País Vasco (4 fronte a 17); Cantabria (3 fronte a 11); e Andalucía (41 fronte a 48). Estes territorios representan o 91 por cento da diferenza entre os falecidos entre 2021 e 2020.
A comunidade galega sitúase así como a sexta con máis mortes de todo o Estado, mentres que en 2020 era o terceiro territorio con máis falecidos por esta causa (compartido con Cataluña). A Comunidade Valenciana mantense como o territorio español que máis mortes rexistra; Andalucía, Cataluña e Canarias repiten nos postos segundo, terceiro e cuarto e Illas Baleares colócase no quinto.
