O Consello da Cultura Galega e a Fundación María José Jove colaborarán na preservación do patrimonio cultural

O Consello da Cultura Galega e a Fundación María José Jove promoverán a preservación do patrimonio cultural e natural galego e sustentabilidade. Segundo informan, farano desenvolvendo accións e actividades que contribúan a analizar e promover este patrimonio, en virtude dun convenio asinado polas presidentas de ambas as entidades, Rosario Álvarez e Felipa Jove, respectivamente.

A alianza de ambas as entidades, explican, facilitará a conexión entre persoas de diferentes disciplinas e ámbitos e fomentará a produción do coñecemento en relación a Galicia e a súa cultura.

Mediante o acordo subscrito, o Consello da Cultura Galega e a Fundación María José Jove comprométense a desenvolver cursos, traballos de investigación, publicacións, conferencias e coloquios de divulgación.