Antonio López, único candidato ás eleccións a reitor da Universidade de Santiago

A Comisión Electoral Central da Universidade de Santiago de Compostela (USC) proclamou ao actual reitor, Antonio López, como único candidato ás eleccións a este cargo. Así o fixo este luns tras rematar o prazo para a presentación de recursos para a elección de candidaturas a reitor da USC, posto ao que López aspira a repetir.

No caso da elección de representantes no Claustro Universitario, o número de persoas candidatas ascendeu a 176 no sector I, 47 no sector II, 121 no sector III e 54 no sector IV.

Pola súa banda, 290 foi o número de candidaturas rexistradas na elección de representantes de estudantes nas Xuntas de Centro.

A campaña electoral celebrarase do 15 ao 21 de febreiro. Tras a xornada de reflexión do día 22, as votacións terán lugar --por vía electrónica-- o 23 de febreiro --entre as 9,00 e a 19,00 hora--. A proclamación definitiva a reitor será o 9 de marzo.