Sanidade ou servizos sociais entre as propostas de PSdeG e BNG, PPdeG reclaman axudas ao Goberno para o Xacobeo

Ciencia, sanidade, servizos sociais, renovables e enerxía centran as principais propostas de resolución de nacionalistas e socialistas para debater e votar na última xornada do Debate sobre o Estado do País.

BNG

A viceportavoz parlamentaria do BNG Olalla Rodil detallou este xoves as propostas de resolución dos nacionalistas para debater e votar na última xornada do Debate sobre o Estado da Autonomía, entre as que mencionou iniciativas para pór a riqueza de Galicia ao servizo dos galegos como un fondo soberano para investimentos estratéxicos, así como "para acabar co modelo de espolio enerxético" e outras medidas para incrementar o orzamento de Atención Primaria e do Servizo de Axuda non Fogar. Son un total de 40 propostas "serias e ambiciosas" para "mellorar as condicións de vida dos galegos e dotar o país de mellores ferramentas para enfrontar os retos que veñen" en tres ámbitos principais: económico, social e político.

En rolda de prensa este xoves, Rodil reiterou a "man tendida" co resto de grupos para "facer avanzar" Galicia e "mellorar e blindar os servizos públicos". "Se o PP quere iso, a man do BNG está aí", insistiu antes de subliñar que non lle darán a man para que "traballe de maneira desleal en contra dos intereses de Galicia" e que tome decisións "que van en contra dos galegos".

Así, Rodil comezou por detallar as propostas do BNG en materia económica. Co foco en "pór a riqueza de Galicia ao servizo dos galegos" e do "desenvolvemento do país", en lugar da "'rapina' dun puñado de empresas para as que traballa o PP", a viceportavoz mencionou a creación dun fondo soberano para investimentos estratéxicos dotado con 1.200 millóns ata 2030, dunha corporación industrial pública galega ou o impulso da ciencia como motor económico, ademais da quita da débeda.

PSdeG

Máis investimento en ciencia, apostar polas enerxías renovables, combater as listas de espera en sanidade, un plan de emprego xuvenil con 100 millóns de euros ao ano e aceptar a condonación da débeda son algunhas das medidas que figuran entre as 40 propostas do Partido Socialista de Galicia presenta para o Debate do Estado da Autonomía.

As propostas foron presentadas este xoves polo secretario xeral e portavoz parlamentario do PSdeG, José Ramón Gómez Besteiro, quen destacou que se trata de propostas "realizables" para actuar de forma "inmediata e eficaz" ante os problemas e as necesidades dos galegos. Ademais, sostivo que as propostas tamén deixan clara a posición política e a ideoloxía do PSdeG, como se evidencia na primeira destas propostas que sinala que todos os proxectos estratéxicos industriais en Galicia deben facerse co máximo respecto ás normativas ambientais, mostrando solvencia e fiabilidade, cumprindo criterios de transparencia absoluta e vinculados ás necesidades rales de Galicia.

Nesta liña, considera que o proxecto GAMA de Altri "evidencia non cumprir eses criterios e non debe ser merecedor de fondos públicos das administracións". Preguntado sobre se ve posible que se alcancen acordos nesta cita política, Besteiro destacou que "a esperanza é o último que se perde" e destacou que os socialistas acoden cunha "visión absolutamente aberta e positiva" como, na súa opinión, evidenciouse na xornada do mércores. Besteiro tamén destacou "unha aposta clara polas enerxías renovables, pola enerxía ecólica terreste e pola eólica mariña", así como polo biometano e polo hidróxeno". A maiores, os socialista propoñen alcanzar o obxectivo do 3 % do orzamento en I+D+i para o 2030, centrados nun "modelo produtivo baseado no coñecemento e a innovación".

Por outra banda, o PSdeG propón un Banco Público de Aluguer que mobilice 5.000 vivendas baleiras e a construción de nova vivenda pública "vinculada permanentemente ao público, sen capacidade de que poidan escapar aos mercados especulativos". En sanidade, Besteiro insistiu en que "é posible que a atención primaria sefaga en 48 horas" como propoñen os socialistas e criticou que "despois de 16 anos no goberno, o PP non asumise a planificación da reposición de persoal". O PSdeG tamén inclúe unha iniciativa para mellorar a saúde mental e combater as listas de espera, "unha das principais preocupacións" dos galegos.

O tamén portavoz parlamentario do PSdeG defendeu de novo a condonación da débeda autonómica. "Eu aínda non atopo un galego que estea en contra da condonación. Bueno, atopei un, o presidente da Xunta", ironizou. Besteiro sostivo que se trata do "primeiro capítulo do financiamento autonómico" tendo en conta que "incorpora criterios como a poboación axustada, a dispersión e o envellecemento", que considera que son criterios que se deben de ter en conta. E sobre as competencias, Besteiro reclamou un enfoque "serio e rigoroso". "Un presidente, aínda que teña maioría absoluta, o que ten que facer é abrirse á posibilidade de debates estruturais, a escoitar á oposición e reunirse con ela".

Así, criticou que Rueda "bote balóns fóra" sobre as competencias que xa son propias mentres quere algunha outra máis. "A sanidade é unha competencia propia, a vivenda é unha competencia propia. Se non asumimos as competencias que temos, que mensaxe estamos a trasladar de adquirir novas?", preguntou. Ademais, Besteiro reivindicou o papel do PSdeG como forza útil. "Non é só propor, senón propor con medidas e con camiños que son aceptables e posibles" porque, conforme indicou, "a política hai que trasladala a través dos camiños da realidade, da posibilidade, non só da utopía e da ficción".

DO

Pola súa banda, o deputado de Democracia Ourensana no Pazo do Hórreo, Armando Ojea, pide á Xunta garantir que as vías de titularidade autonómica integradas en zonas urbanas sexan obxecto de cesión aos concellos correspondentes "unicamente despois do seu arranxo integral". Tamén demanda ao Goberno autonómico que asuma directamente os custos de mantemento dos centros públicos de ensino obrigatorio, garantir a cobertura do servizo de transporte público entre núcleos rurais e os principais centros de servizo, así como establecer un fondo extraordinario para investimentos prioritarios en municipios que sufran "situacións recorrentes de infrainversión ou déficit estrutural en servizos básicos".

Aínda sobre cuestións para os municipios, Democracia Ourensana expón un plan de recuperación e posta en valor dos centros históricos das cidades galegas e desenvolver un programa de apoio económico e técnico para a rehabilitación e posta en uso de vivendas baleiras en zonas de declive demográfico. Entre as súas propostas tamén incorpora instar á Xunta a elaborar un informe anual de execución orzamentaria por provincias, "con publicación pública e acceso á cidadanía" e a incrementar o investimento en infraestruturas deportivas de uso público, "garantindo criterios de equilibrio territorial".

En materia sanitaria, o deputado ourensán propón pór en marcha un plan específico de mellora e modernización das infraestruturas hospitalarias, reforzar os servizos de atención primaria e garantir o acceso á atención sanitaria especializada "sen discriminación por territorio". Ademais, para a provincia de Ourense, Ojea inclúe unha única demanda que afecta especificamente a este territorio: instar á administración autonómica a iniciar os estudos técnicos e orzamentarios necesarios para prolongar a autovía AG-31 ata a fronteira con Portugal.

PROPOSTAS DO PPDEG

A secretaria xeral do PPdeG, Paula Prado, tamén viceportavoz parlamentaria, compareceu este xoves para desagregar as propostas de resolución populares no marco do Debate sobre o Estado da Autonomía (DEA), á vez que garantiu que afronta as negociacións desta xornada "con toda a vontade de consenso" aínda que, admitiu, as iniciativas dos grupos son "moi antagónicas".

É máis, garantiu ofertas para alcanzar acordos que serán "asumibles" para "calquera partido que queira participar nunha democracia moderna do século XXI". Pola súa banda, como é habitual, os populares esgotaron a cota de rexistrar 40 propostas de resolución que plasman os anuncios realizados na primeira xornada do debate polo seu xefe de filas e presidente da Xunta, Alfonso Rueda.

Os populares tamén poñen o foco nunha gran parte das súas propostas no Goberno central, ao que esixen pasos en varios ámbitos: desde "un maior apoio económico" para o Xacobeo, a avances en infraestruturas e financiamento. Tamén instan á Xunta a insistir para lograr os traspasos da AP-9 e o rescate da súa concesión, a xestión do ingreso mínimo vital, ou as transferencias de meteoroloxía, e as de permisos laborais para estranxeiros vinculados aos de residencia.

A pesar de que o clima non se presenta como moi favorable a priori en vista dos antecedentes, os populares tampouco renuncian a un "pacto" polo galego e introducen algunhas propostas en clave máis ideolóxica, por exemplo que instar a que o Parlamento "subscriba" a resolución do Parlamento europeo do 19 de setembro de 2019 "de condena dos totalitarismos nazi e comunista".

Os populares tamén queren unha resolución no Hórreo que rexeite "expresamente actitudes de turismofobia" e, ademais de incidir no desenvolvemento da competencia de xestión do litoral, insta a demandar ao Goberno central as modificacións lexislativas necesarias para que o presidente da Confederación Hidrográfica Miño-Sil sexa "nomeado e separado a proposta da Xunta". O obxectivo é o de "garantir unha xestión máis coordinada e eficiente das concas fluviais que discorren por Galicia".