Os pediatras piden retirar as máscaras dos colexios, tamén en interiores

A Asociación Española de Pediatría, a través do seu Grupo de Traballo de Reapertura da Escolarización, propuxo un calendario para a "retirada progresiva" das máscaras nos recintos escolares. Nun documento que foi remitido esta mesma semana ás institucións sanitarias e educativas, os pediatras expoñen a retirada "inmediata" da obrigatoriedade do uso das máscaras en exteriores para todos os alumnos e a retirada "progresiva" da obrigatoriedade en interiores, cun reforzo dos protocolos de ventilación.

En primeiro e segundo de primaria, esta retirada produciríase a partir do luns 28 de febreiro; en terceiro e cuarto de primaria a partir do luns 14 de marzo; en quinto e sexto de primaria a partir do luns 28 de marzo; en Educación Secundaria Obrigatoria (ESO) a partir do luns 25 de abril; e en bacharelato a partir do luns 9 de maio. A AEP sinala no documento a importancia de continuar fomentando a vacinación contra a COVID-19, sobre todo entre os menores de 12 anos, e móstrase partidaria de restrinxir a obrigatoriedade de corentena a 7 días unicamente a aqueles nenos confirmados positivos, eliminando o resto das recomendacións actuais.

"O menor impacto clínico da variante ómicron da COVID-19 e a elevada cobertura da vacina sobre a poboación española permitiron cambiar a paradigma do manexo da situación pandémica en España. Actualmente, exponse centrar os esforzos en previr os casos con maior impacto clínico e focalizar as enerxías en protexer aos máis vulnerables a través da vixilancia epidemiolóxica por parte dunha serie de centros repartidos polo territorio que monitoricen a situación para detectar brotes e cambios nas tendencias epidemiolóxicas e no comportamento do virus ou dos seus eventuais novas variantes", lembran os expertos do Grupo de Traballo de Reapertura da Escolarización da AEP no documento de posicionamento.

MÁSCARA EN EXTERIORES

A recente recomendación de retirar a obrigatoriedade de máscaras en exteriores en todo o país e da necesidade de manter unha distancia de seguridade de 1,5 metros, salvo no caso de grandes aglomeracións, é aplaudida polos pediatras --ao contrario que a Xunta--, que consideran "incoherente seguir penalizando aos nenos e manter a obrigación do uso de máscara no patio, cando ao saír á rúa xa non teñen que usalas".

Respecto ao uso de máscaras en contornas pechadas, onde está demostrado que o risco de transmisión é entre 15 a 20 veces superior que nos espazos abertos, os pediatras sinalan as características que fan da contorna escolar un modelo de monitorización idóneo para a desescalada progresiva de máscaras en interiores: nos dous últimos anos confirmouse a menor infecciosidade dos nenos e o seu menor risco de enfermar.