Só tres sobreviventes do Villa de Pitanxo por agora: dous galegos e un mozo de Ghana
Trátase do patrón do barco e dous mariñeiros.
Por Europa Press / Redacción | Marín | 16/02/2022 | Actualizada ás 11:50
A traxedia do Villa de Pitanxo deixa polo momento tan só tres sobreviventes dos 24 que conformaban a súa tripulación. Entre eles están o patrón do barco Juan Padín, e o seu sobriño, os dous galegos.
O terceiro sobrevivente é un mozo natural de Ghana, residente en Marín, que xunto cos outros dous tripulantes foi rescatado pola 'Playa Menduiña Dos'. Distintas fontes consultadas por Europa Press ratificaron que se trata de Samuel, un mozo que vive na vila mariñeira e cuxa familia, segundo recollen varias fontes locais, reside en África.
A tripulación estaba composta por 24 persoas: 16 españois, 5 peruanos e 3 ganeses.
DESAPARECIDO
Por outra banda, o alcalde de Lepe (Huelva), Juan Manuel González, sinalou este mércores que un dos mariñeiros desaparecidos da tripulación é un mariñeiro do municipio de 55 anos e que estaba a un mes de xubilarse.
"Á primeira hora contactamos cos familiares e coas administracións para coñecer a última hora e trasladáronnos que este veciño se atopa entre os desaparecidos, polo que aínda hai un fío de esperanza, aínda que, segundo me comentan, as augas desa zona son moi complicadas", explicou o primeiro edil.
